लालपरीला भेट… माहेरवाशिणींनी दोन दिवसांत मिळवून दिले तीन कोटी

महाराष्ट्र राज्य मार्ग परिवहन महामंडळाच्या सातारा विभागातील अकरा आगारांतील एसटी बसमधून भाऊबीज सणानिमित्ताने अनेक बहिणींनी प्रवास केला. त्यामुळे दोन दिवसांत 3 कोटी 34 लाख 79 हजार रुपयांचा महसूल विभागाला प्राप्त झाला.

सातारा विभागातील सातारा, कराड, पाटण, वाई, महाबळेश्वर, पारगाव – खंडाळा, मेढा, फलटण, कोरेगाव, वडूज, दहीवडी या 11 आगारांतून दिवाळी सणाच्या पार्श्वभूमीवर जादा बसेस सोडण्यात आल्या होत्या. तसेच महिला सन्मान योजनेमुळे एसटीकडे महिला प्रवाशांचा ओढा मोठय़ा प्रमाणात वाढला आहे. दिवाळी काळात 725 एसटी बसेसमधून जास्तीत जास्त प्रवासी वाहतुकीसाठी तत्कालीन विभाग नियंत्रक विकास माने यांच्यासह अन्य अधिकाऱयांनी नियोजन केले होते. त्यामुळे मोठय़ा प्रमाणात सर्व आगारांतील बसेसमार्फत प्रवासी वाहतूक करण्यात आली. दरवर्षीप्रमाणे यंदाही भाऊबीज सणानिमित्त ग्रामीण आणि शहरी भागांतील महिलांचा माहेरी जाण्याचा उत्साह ओसंडून वाहत असल्याचे दिसून आला. दि.23 व 24 ऑक्टोबर रोजी बसस्थानक विशेषतः महिला प्रवाशांनी फुलून गेली होती.

दोन दिवसांतील एकूण उत्पन्न

दीपावली सणात भाऊबीज सणादिवशी दि. 23 ऑक्टोबर रोजी 1 कोटी 67 लाख 41 हजार रुपये, दि. 24 ऑक्टोबर रोजी 1 कोटी 67 लाख 38 हजार 286 रुपये असा मिळून 3 कोटी 34 लाख 79 हजार रुपयांचा महसूल सवलत मूल्यासह सातारा विभागाला मिळाला आहे.