राजस्थान रॉयल्स संघामध्ये केशव महाराजचा समावेश

वृत्तसंस्था/ नवी दिल्ली

सध्या सुरू असलेल्या 2024 च्या आयपीएल क्रिकेट स्पर्धेसाठी राजस्थान रॉयल्स संघामध्ये दक्षिण आफ्रिकेचा डावखुरा फिरकी गोलंदाज केशव महाराजचा समावेश करण्यात आला आहे. राजस्थान संघातील प्रसिद्ध कृष्णाच्या जागी केशव महाराजला बदली खेळाडू म्हणून संघात स्थान देण्यात आले आहे.

त्याचप्रमाणे या स्पर्धेत खेळणाऱ्या कोलकाता नाईट रायडर्स संघाने जखमी मुजीब उर रेहमानच्या जागी अफगाणचा 16 वर्षीय फिरकी गोलंदाज अल्ला गझनफरला संधी दिली आहे. 16 वर्षीय गझनफरने आतापर्यंत टी-20 च्या दोन सामन्यात अफगाण संघाचे प्रतिनिधीत्व केले आहे. त्याने आतापर्यंत टी-20 चे तीन सामने तसेच सहा अ दर्जाचे सामने खेळले आहेत. टी-20 सामन्यात त्याने 5 गडी तर अ दर्जाच्या सामन्यात 4 गडी बाद पेले आहेत. कोलकाता नाईट रायडर्सने गझनफरला 20 लाख रुपयांच्या बोलीवर खरेदी केले आहे. कर्नाटकाचा वेगवान गोलंदाज प्रसिद्ध कृष्णा याच्या स्नायू दुखापतीवर अलिकडेच शस्त्रक्रिया करण्यात आल्याने तो आयपीएल स्पर्धेसाठी उपलब्ध राहू शकणार नाही. दक्षिण आफ्रिकेच्या केशव महाराजने आपल्या वैयक्तिक क्रिकेट कारकिर्दीत 50 कसोटी, 44 वनडे आणि 27 टी-20 सामन्यात एकूण 237 बळी मिळविले आहेत. त्याशिवाय त्याने 159 टी-20 सामन्यात 130 गडी बाद केले असून राजस्थान रॉयल्सने त्याला 50 लाख रुपयांच्या बोलीवर खरेदी केले आहे.