पंकज अडवाणी, कॉजियर उपउपांत्यपूर्व फेरीत

अ.भा. सीसीआय बिलियर्ड्स क्लासिक 2024 स्पर्धा

वृत्तसंस्था/ मुंबई

वर्ल्ड चॅम्पियन पंकज अडवाणी व इंग्लंडचा डेव्हिड कॉजियर यांनी सलग तिसरे विजय नोंदवत येथे सुरू असलेल्या ऑल इंडिया सीसीआय बिलियर्ड्स क्लासिक 2024 स्पर्धेची उपउपांत्यपूर्व फेरीत स्थान मिळविले.

अडवाणीने गट अ मधील चुरशीच्या लढतीत मुंबईच्या रायन रझमीचा कडवा प्रतिकार मोडून काढत 603-418 असा विजय मिळविला. अडवाणीने 235 च्या ब्रेकने सुरुवात केली आणि नंतर 90 चा ब्रेक मिळवित विजय साकार केला. रायनने 93 व 124 गुणांचे ब्रेक्स नोंदवले. रायन पराभूत झाला असला तरी त्याने दोन विजय मिळवित उपउपांत्यपूर्व फेरीत स्थान मिळविले आहे.

गट क मधील लढतीत इंग्लंडच्या कॉजियर अनेक वर्ल्ड टायटल्स जिंकणारा खेळाडू असून त्याने महाराष्ट्राच्या महेश जगदाळेचा 1168-418 असा एकतर्फी पराभव केला. कॉजियरने 203, 124, 160, 152, 162, 93, 70 अशा गुणांचे ब्रेक्स नोंदवले.

वर्ल्ड चॅम्पियनशिपचा उपविजेता सौरव कोठारी पुन्हा विजयपथावर आला असून गट फ मधील सामन्यात त्याने अनुभवी अलोक कुमारचा 889-200 असा पराभव केला. कोठारी व मुंबईचा रोहन जंबुसरिया या गटातून बाद फेरीसाठी पात्र ठरले आहेत. गट ह मध्ये सिद्धार्थ पारिख व अरुण अगरवाल यांनीही आपापले शेवटचे सामने जिंकून आगेकूच केली आहे. सिद्धार्थने सलग तीन विजय नोंदवत गटात अग्रस्थान मिळविले. त्याने 183, 71, 96, 72 असे ब्रेक्स नोंदवत इंग्लंडच्या ख्रिस टेलरचा 671-254 असा पराभव केला. अगरवालने कनिश्क झांझरियावर 702-280 असा विजय मिळविताना 157, 61, 95, 79 असे ब्रेक्स नोंदवले. गट ई मधून कमल चावलाने रिषभ ठक्करला तर ध्रुव सितवालाने एस. रझमीचा पराभव करून आगेकूच केली आहे.