इंग्लंड महिलांचा मालिकाविजय

न्यूझीलंड महिलांवर 47 धावांनी मात, मालिकेत 3-1 ने विजयी आघाडी

वृत्तसंस्था/ वेलिंग्टन

येथे झालेल्या महिलांच्या चौथ्या टी-20 सामन्यात इंग्लंडने यजमान न्यूझीलंडचा 47 धावांनी पराभव करून पाच सामन्यांच्या मालिकेत 3-1 अशी विजयी आघाडी घेतली. 56 चेंडूत 91 धावा फटकावणाऱ्या माइया बाऊचरला सामन्यातील सर्वोत्तम खेळाडूचा पुरस्कार देण्यात आला.

या सामन्यात न्यूझीलंडने नाणेफेक जिंकून इंग्लंड महिलांना प्रथम फलंदाजी दिली. इंग्लंडने 20 षटकांत 3 बाद 177 धावा फटकावल्या. त्यानंतर न्यूझीलंडला 20 षटकांत 7 बाद 130 धावांवर रोखत इंग्लंडने हा सामना 47 धावांनी जिंकला. इंग्लंडची खराब सुरुवात झाली असली तरी बाऊचरने प्रथम अॅलीस कॅप्सेसमवेत दुसऱ्या गड्यासाठी 75 धावांची भागीदारी केली. नंतर नॅट सिव्हर ब्रंटसमवेत तिसऱ्या गड्यासाठी 38 धावांची भर घातल्यानंतर बाऊचर 91 धावा काढून बाद झाली. तिने 56 चेंडूत 12 चौकार, 2 षटकार ठोकले. डॅनी वॅट 9 तर कॅप्से 32 चेंडूत 25 धावा काढून बाद झाली. सिव्हर ब्रंट व कर्णधार हीदर नाईट यांनी चौथ्या गड्यासाठी 20 चेंडूत 35 धावांची अभेद्य भागीदारी केली. न्यूझीलंडच्या रोजमेरी मायर, फ्रान जोनास, अमेलिया कर यांनी एकेक बळी मिळविले.

इंग्लंड महिलांच्या भेदक माऱ्यापुढे न्यूझीलंडला हे आव्हान पेलवले नाही आणि 20 षटकांत त्यांना बाद 130 धावांपर्यंतच मजल मारता आली. बर्नाडाइन बेझुडेनहाऊटने 23, अमेलिया करने 17 चेंडूत 21, ब्रूक हॅलिडेने 23 चेंडूत 25, इजाबेला गेझने 15, जेस केरने नाबाद 13 धावा जमविल्या. त्यांच्या इतर फलंदाजांना दुहेरी धावसंख्या गाठता आली नाही. चार्ली डीन इंग्लंडची सर्वात यशस्वी गोलंदाज ठरली. तिने 26 धावांत 4 तर लॉरेन बेल, डॅनियली गिब्सन, सोफी एक्लेस्टोन यांनी एकेक गडी बाद केले.

या मालिकेतील शेवटचा सामना शुक्रवारी 29 मार्च रोजी होणार असून त्यानंतर 1 एप्रिलपासून तीन सामन्यांची वनडे मालिका होणार आहे.

संक्षिप्त धावफलक : इंग्लंड महिला 20 षटकांत 3 बाद 177 : बाऊचर 56 चेंडूत 91, वॅट 9, कॅप्से 32 चेंडूत 25, सिव्हर ब्रंट 14 चेंडूत नाबाद 29, हीदर नाईट 9 चेंडूत नाबाद 21, अवांतर 2. अमेलिया कर 1-42, रोजमेरी मायर 1-28, फ्रान जोनास 1-39. न्यूझीलंड महिला 20 षटकांत 7 बाद 130 : हॅलिडे 23 चेंडूत 25, बेझुडेनहाऊट 22 चेंडूत 23, अमेलिया कर 17 चेंडूत 21, गेझ 17 चेंडूत 15, जेस केर नाबाद 13, अवांतर 9. चार्ली डीन 4-26, एक्लेस्टोन 1-19, लॉरेन बेल 1-24, गिब्सन 1-22.