Latur News – अतिवृष्टीमुळे लातूरमध्ये जनजीवन विस्कळीत, सैन्य दलाचे पथक दाखल, 10 जणांची सुखरूप सुटका

लातूर जिल्ह्यातील पूर परिस्थितीच्या पार्श्वभूमीवर खबरदारीचा उपाय म्हणून जिल्हाधिकारी वर्षा ठाकूर-घुगे यांच्या सूचनेनुसार भारतीय सैन्य दलाचे पथक पाठविण्याची विनंती करण्यात आली होती. त्यानुसार सैन्य दलाचे पथक अहमदपूर येथे दाखल झाले आहे. मागील दोन दिवसांपासून लातूर जिल्ह्यात पावसाने हाहाकार उडाला आहे. जिल्ह्यातील सर्व नद्या दुथडी भरुन वाहत आहेत. जिल्ह्यातील ५० पेक्षा अधिक मार्गावरील रस्ते वाहतूक ठप्प झाली आहे. पावसाचा अंदाज लक्षात घेऊन जिल्हाधिकारी वर्षा ठाकूर घुगे यांनी सैन्य दलाचे पथक पाठवण्याची विनंती केली होती. सैन्य दलाचे पथक अहमदपूर येथे दाखल झाले असून आवश्यकतेनुसार नागरिकांच्या शोध व बचाव कार्यासाठी त्यांची मदत घेतली जाणार आहे.

शिरूर अनंतपाळ येथे नदीकाठावरील शेडमध्ये अडकलेल्या पाच व्यक्तींना स्थानिक पथकाने सुखरूप बाहेर काढले. अहमदपूर तालुक्यातील मौजे काळेगाव येथील साठवण तलावाच्या सांडव्यावर अडकलेल्या एका व्यक्तीची तातडीने सुटका करण्यात आली.

शिरूर अनंतपाळ येथील घरणी नदीवरील पुलाच्या बांधकामादरम्यान पाण्यात अडकलेल्या तीन मजुरांना स्थानिक पथकाच्या मदतीने सुरक्षितपणे बाहेर काढण्यात आले. तसेच, मौजे माकणी येथे गावाजवळील पुलावरून जाताना पाण्यात वाहत गेलेल्या दौलत गोपाळ डोंगरगावे यांना स्थानिक गावकऱ्यांनी वाचवले. त्यांना किरकोळ दुखापती झाल्याने सध्या त्यांच्यावर रुग्णालयात उपचार सुरू आहेत, अशी माहिती जिल्हा आपत्ती व्यवस्थापन कक्षाने दिली आहे.