महाराष्ट्राचे कुलदैवत असलेल्या श्रीक्षेत्र जेजुरी येथे सलग सुट्ट्यांमुळे भाविक आणि पर्यटकांची प्रचंड गर्दी झाली होती. कडेपठारच्या डोंगरातील खंडोबा व जेजुरी गडामधील खंडोबा या दोन्ही ठिकाणी दर्शनासाठी भाविकांच्या रांगा लागल्या होत्या. भंडाऱ्याची उधळण करत भाविकांनी येळकोट येळकोटचा केलेल्या जयघोषाने जेजुरी गड दुमदुमून गेला होता. शुक्रवारपासूनच जेजुरीतील धर्मशाळा, लॉज, पुजाऱ्यांची घरे येथे भाविक मोठ्या संख्येने उतरले होते. उपाहारगृहे गर्दीने फुलली होती. या कालावधीत आर्थिक उलाढाल चांगली झाली.
कडेपठारच्या डोंगरातील खंडोबाचे दर्शन घेण्यासाठी येथेही भाविकांची मोठी गर्दी झाली होती. डोंगरात हलकासा पाऊस सतत पडत आहे. डोंगराच्या परिसरात हिरवीगार वनराई बहरली असल्याने भाविकांबरोबर पर्यटकांची गर्दी झाली होती. आज श्रावणी सोमवार असल्याने कडेपठार मंदिर, खंडोबा गड व लवथळेश्वर मंदिरामध्ये भाविकांसह ग्रामस्थांनी गर्दी केली होती. सध्या खोबऱ्याचा भाव चारशे रुपये किलोच्या पुढे गेल्याने भाविकांकडून भंडार-खोबऱ्याची उधळण कमी प्रमाणात होत आहे.
ढोल-ताशा पथकाची गडावर हजेरी
सार्वजनिक गणेशोत्सव तोंडावर आल्याने पुणे परिसरात सर्वत्र ढोल-ताशांचा नाद घुमू लागला आहे. विशेष म्हणजे अनेक ढोल-ताशा पथके जेजुरी गडावर येऊन ढोल-ताशांचा गजर करून देवापुढे हजेरी देत आहेत. आज कोथरूड येथील ब्रह्मचैतन्य ढोल-ताशा पथकाने जेजुरी गडावर येऊन ‘येळकोट येळकोट जय मल्हार’ म्हणत ढोल-ताशांचा निनाद केला. या आवाजाने गडातील वातावरण भक्तिमय झाले. श्री मार्कंडे देवस्थानचे मुख्य विश्वस्त मंगेश घोणे यांनी पथकाचे स्वागत केले.
ऐतिहासिक लवथळेश्वर मंदिरात ग्रामस्थांची गर्दी
जेजुरी-सासवड रस्त्यावर असलेल्या प्राचीन लवथळेश्वर मंदिरामध्ये दर्शनासाठी ग्रामस्थांची दिवसभर गर्दी होती. पौराणिक कथेनुसार लव ऋषींचे येथे वास्तव्य होते. श्री समर्थ रामदास स्वामी यांनी याच शंकराच्या मंदिरात बसून लवथळती विक्राळा ब्रह्मांडी माळा ही शंकराची प्रसिद्ध असलेली आरती तयार केली. महाराष्ट्र शासनाच्या पुरातत्व खात्याने या मंदिराचा जिर्णोद्धार केला. ऐतिहासिक पेशवे तलावाच्या काठी असलेल्या बल्लाळेश्वर मंदिरातही महादेवाच्या दर्शनासाठी गर्दी केली होती.
Comment List