जालन्यातील वैतागवाडीच्या खदानीत बुडून दोन मुलींचा मृत्यू

जालना जिल्ह्यातील अंबड तालुक्यातील गोंदी जवळील वैतागवाडी येथील खदानात दुपारच्या वेळी दोन मैत्रीणी कपडे धुण्यास गेल्या असता त्या दोघींचाही या खदाणीत बुडून दुर्देवी मृत्यू झाला आहे. ही घटना सोमवार 25 मार्च रोजी दुपारी 11 वाजता घडली. यातील कमल सुभाष भालेराव ही मुळची हालदोला ता. बदनापूर, जि. जालना येथील तर असरीन हुसेन शेख ही मुळची गेवराई जि.बीड येथील आहे.

अंबड तालुक्यातील गोदीजवळील वैतागवाडी जवळील खदानीत भरपूर पाणी असल्याने दूपारच्या वेळेस कमल सुभाष भालेराव (14) असरीन हुसेन शेख (14) या दोन्ही रा.गोंदी ईदगाह जवळ या दोघी शेजारीच राहत असल्याने मैत्रिणी कपडे धुण्यासाठी घरातून एकत्र निघाल्या. शहागड-गोंदी रस्ता सर करुन घराजवळच एक कि.मी.असलेल्या डांबर तोडून मानव निर्मित करण्यात आलेल्या खदानीत कपडे धुण्यासाठी सोमवारी 25 मार्च रविवारी दुपारी गेल्या होत्या. कपडे धुण्यासाठी खदानीत दगडावर बसतांना एकीचा तोल जाऊन ती पाण्यात पडल्याने दुसरीने तिला वाचवण्याचा प्रयत्न केला. परंतु दोघींनाही पाण्यात पोहता येत नसल्याने दोघींना पाण्याबाहेर येता आले नाही. खदानीच्या वर असलेल्या एका लहान मुलाने ही घटना पाहिली आणि त्याने जवळ असलेल्या रहिवाशी व नागरीकांना बोलवण्यासाठी धाव घेतली. पंरतु रंगपंचमी सण आणि ऊन असल्याने जवळ कोणीच नव्हते. या दोघींनाही वाचविण्यास मदत मिळू शकली नाही.

काही वेळानंतर गावकर्‍यांना व नातेवाईकांना याची माहिती मिळताच त्यांनी खदानीकडे धाव घेवून अर्ध्या तासानंतर पाण्याच्या बाहेर काढण्यात आले. सुट्टीचा दिवस असल्याने 50 मिटर अंतरावर जवळच असलेली गोंदी प्राथमिक आरोग्य केंद्रातही कोणी उपस्थित नसल्याने त्यानंतर नातेवाईकंनी खाजगी वाहनातून शहागड येथे दवाखान्यात आणले होते. पंरतू डॉक्टरांनी दोंघींनाही तपासून मृत घोषित केले. घटनेची माहिती पोलीस उपनिरीक्षक गणेश जागडे,शाकेर सिद्दिकी यांना मिळताच घटनास्थळ पंचनामा करुन गोंदी पोलीस ठाण्यात अकस्मात मदतीची नोंद घेण्यात आलेली आहे.

कमल सुभाष भालेराव ही मुलगी हालदोला ता. बदनापूर जि.जालना येथील असून ती ऊसतोडी करण्यासाठी आपल्या आई-वडिलासोबत गोदी जवळील ईदगाहाजवळ राहत होती. तर असरिन हुसेन शेख ही मुळची गेवराई जि.बीड येथील असून ती मागील चार वर्षांपासून गोंदी जवळील इदगाह जवळ राहत आहे. यावेळी शहागडचे वैद्यकीय अधिकारी मरकड, वैद्यकीय अधिकारी डॉ. बिराजदार यांनी शवविच्छेदन करून मृतदेह नातेवाईकांच्या ताब्यात देण्यात आले.