एक मोठा नेता महाशक्तीकडून हळूहळू संपवला जातोय; रोहित पवार यांचा अजित पवारांना सूचक इशारा

अजित पवार काही आमदारांसह राष्ट्रवादीतून बाहेर पडल्यानंतर राज्यातील राजकीय समीकरणे बदलली आहेत. लोकसभा निवडणुकीच्या जागावाटपात अजित पवार गटाला किती जागा येणार, याची चर्चा सुरू आहे. तसेच एकेका जागेसाठी अजित पवार यांना दिल्लीला जावे लागत आहे. तसेच शिंदे गटाएवढ्याच जागा आम्हाला पाहिजे, अशी मागणी अजित पवार यांच्या गटाने केली आहे. त्यामुळे अपेक्षित जागा मिळवण्यासाठी अजित पवार यांना संघर्ष करावा लागत आहे. या सर्व घटनांवरून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी अजित पवार यांना धोक्याचा सूचक इशारा दिला आहे. एक मोठा नेता महाशक्तीकडून हळूहळू संपवला जातोय, असा इशारा रोहित पवारांनी दिला आहे.

रोहित पवार यांनी याबाबत एक्सवर पोस्ट केली आहे. त्यात त्यांनी म्हटले आहे की, एरवी रुबाबदारपणे तिकिटं वाटणाऱ्या हातांना आज तिकिटांसाठी हात पुढं करावे लागत असतील आणि तेही हातात चाराणे टेकवल्याप्रमाणे चार तिकिटं पडत असतील तर त्या रुबाबदार हातांना मानणाऱ्यांचाही हा अवमान आहे. एकेकाळचा त्यांचा फॅन आणि कार्यकर्ता म्हणून दुःख या गोष्टीचं वाटतं की, एक मोठा नेता #महाशक्ती कडून हळूहळू संपवला जातोय.. आज लोकसभेला #मॅनेज करतील आणि उद्या विधानसभेला पूर्णपणे #डॅमेज करतील…

एरवी रुबाबदारपणे तिकिटं वाटणाऱ्या हातांना आज तिकिटांसाठी हात पुढं करावे लागत असतील आणि तेही हातात चाराणे टेकवल्याप्रमाणे चार तिकिटं पडत असतील तर त्या रुबाबदार हातांना मानणाऱ्यांचाही हा अवमान आहे. एकेकाळचा त्यांचा फॅन आणि कार्यकर्ता म्हणून दुःख या गोष्टीचं वाटतं की, एक मोठा नेता…

— Rohit Pawar (@RRPSpeaks) March 26, 2024

असे ट्विट करत रोहित पवार यांनी अजित पवार यांना महाशक्तीकडून संपवण्याचा प्रयत्न सुरू असल्याचे म्हटले आहे. महायुतीत त्यांना एकेका जागेसाठी संघर्ष करावा लागत आहे. तसेच लोकसभा निवडणुकांसाठी ते मॅनेज करतील आणि विधानसभा निवडणुकांच्या वेळी डॅमेज करतील, असा इशारा देत एक मोठा नेता महाशक्तीकडून संपवला जातोय, याबाबत खंत वाटत असल्याचेही राहित पवार यांनी म्हटले आहे.