रत्नागिरीतील शाळकरी मुले ई-सिगारेटच्या जाळ्यात अडकली आहेत.याची गंभीर दखल घेऊन रत्नागिरी शहर पोलिसांनी रत्नागिरी शहरातील तेली आळी नाका येथील एका जनरल स्टोअरवर छापा टाकून तब्बल 1 लाख 72 हजार 500 रुपये किंमतीच्याव 69 ई-सिगारेट जप्त केल्या आहेत. या प्रकरणी दुकानमालक गोविंद दिनेश गजरा याला अटक करण्यात आली आहे.
मागील काही दिवसांपासून जिल्ह्यातील शाळकरी मुलांमध्ये कायद्याने प्रतिबंधित असलेल्या ई-सिगारेटच्या सेवनाचे प्रमाण वाढले होते. अनेकदा मुलांच्या दप्तरांमध्येही त्या ई सिगारेट सापडत होत्या. याबाबत शाळांमधील शिक्षकांनी पोलिसांकडे तक्रारी केल्या होत्या. या तक्रारींची गंभीर दखल घेत रत्नागिरी शहर पोलिसांनी ई-सिगारेट विक्री करणाऱ्यांवर कारवाई करण्यासाठी एक विशेष पथक तयार केले.
आज, 4 ऑगस्ट 2025 रोजी, या पथकाला गोपनीय माहिती मिळाली की, तेली आळी नाका येथील जय गगनगिरी जनरल स्टोअरमध्ये ई-सिगारेटची विक्री होत आहे. माहितीच्या आधारे पोलिसांनी तात्काळ दुकानावर छापा टाकला. या छाप्यात दुकानाचा मालक गोविंद गजरा याच्याकडून 1 लाख 72 हजार 500 रुपये किमतीच्या 69 ई-सिगारेट जप्त करण्यात आल्या. ईलेक्ट्रॉनिक्स सिगारेट प्रतिबंध (उत्पादन, निर्मिती, आयात, निर्यात, वाहतूक, विक्री, वितरण, साठा आणि जाहिरात) कायदा 2019 कलम 7 व 8 नुसार ही कारवाई करण्यात आली आहे.
पोलीस अधीक्षक नितीन बगाटे, अपर पोलीस अधीक्षक बाबुराव महामुनी, उपविभागीय पोलीस अधिकारी निलेश माईनकर आणि पोलीस निरीक्षक विवेक पाटील यांच्या मार्गदर्शनाखाली हि कारवाई करण्यात आली. यामध्ये पोलीस उपनिरीक्षक सागर शिंदे, सपोफौ दिपक साळवी, पोहवा अमोल भोसले, आशिष भालेकर, पंकज पडेलकर, प्रशांत पाटील आणि पोकॉ अमित पालवे यांचा समावेश होता.दरम्यान, जिल्हा पोलीस अधीक्षकांनी शाळा-कॉलेज परिसरातील तंबाखूजन्य पदार्थांच्या विक्रीवरही कडक कारवाई करण्याचे निर्देश दिले आहेत.
.jpeg)
Comment List