मुंबई, कोकण तापणार; विदर्भ, मराठवाड्यात पावसाची शक्यता

यंदा मार्च महिन्यात रात्री आणि पहाटे गारवा जाणवत होता. मात्र, आता मार्चच्या शेवटच्या आठवड्यात राज्यात सरासरी तापमानात वाढ होत आहे. अनेक जिल्ह्यात पारा 40 अंशांवर पोहचला आहे. तर कोकण आणि मुंबईत तापमान 35 अंशांच्या वर गेले आहे. आता पुढील दोन दिवस मुंबई आणि कोकणातील तापमान वाढण्याचा अंदाज वर्तवण्यात आला आहे. तसेच विदर्भ आणि मराठवड्यात पावसाच्या सरी पडण्याची शक्यता आहे.

पुढील चार ते पाच दिवस राज्यात कमाल तापमानात 2 ते 3 अंशानी वाढ होण्याची शक्यता आहे. तसेच मुंबईतही आर्द्रतेचे प्रमाण वाढणार आहे. एप्रिल आणि मे महिन्यात मुंबईची आर्द्रता 75 टक्क्यांची आसपास वाढण्याची शक्यता आहे. त्यावेळी शहरात 38 अंश तापमान जाणवेल. वेस्टर्न डिस्टर्बन्समुळे राज्यासह देशात अनेक भागात पावसाची शक्यता आहे.

पुढील 24 तासांत पश्चिम बंगाल, सिक्कीम, उत्तर ओडिशा, पूर्व झारखंड, पूर्व विदर्भ, छत्तीसगड आणि अरुणाचल प्रदेशात हलक्या ते मध्यम स्वरूपाच्या पावसाची शक्यता वर्तवण्यात आली आहे. राज्यात विदर्भातील चंद्रपूर आणि गडचिरोली येथे पावसासह गारपीट होण्याची शक्यता आहे. तसेच मराठवाड्यात हवामान ढगाळ राहणार असून काही ठिकाणी पावसाच्या सरी कोसळण्याची शक्यता आहे.