भाजपने 37 खासदारांना दाखवला घरचा रस्ता; पाचव्या यादीत कंगना, अरुण गोविल यांना तिकीट

लोकसभा निवडणुकीसाठीच्या उमेदवारांची पाचवी यादी भारतीय जनता पार्टीने जाहीर केली आहे. यात 111 उमेदवारांच्या नावांची घोषणा केली आहे. मात्र, यावेळी पक्षाने केंद्रीय मंत्री अश्विनी कुमार चौबे, वीके सिंह आणि वरुण गांधी यांच्यासह तब्बल 37 विद्यमान खासदारांना घरी बसवले आहे. विशेष म्हणजे, अभिनेत्री कंगना रनौत आणि छोटय़ा पडद्यावर प्रभू श्रीरामाची भूमिका जिवंत करणारे ज्येष्ठ अभिनेते अरुण गोविल यांना यावेळी लोकसभेचे तिकीट देण्यात आले आहे.

केंद्रीय मंत्री धर्मेंद्र प्रधान यांना संबळपूर येथून निवडणुकीच्या रिंगणात उतरवण्यात येणार आहे. 2019 मध्ये प्रधान यांचा पराभव झाला होता. कर्नाटकातून सहा वेळा खासदार राहिलेल्या अनंत कुमार हेगडे यांना मात्र तिकीट देण्यात आलेले नाही. हेगडे यांच्या वादग्रस्त विधानांमुळे भाजपला प्रचंड टीकेचा सामना करावा लागला होता. उत्तर प्रदेशातील नऊ, गुजरातमधील पाच, ओडिशातील चार आणि बिहार, कर्नाटक, झारखंडमध्ये प्रत्येक तीन खासदारांना यावेळी पक्षाने तिकीट दिलेले नाही.

आयात नेत्यांना संधी

अन्य पक्षातून भाजपात आलेल्या सीता सोरेन, तापस रॉय आणि एन. किरण कुमार रेड्डी यांना पक्षाने मैदानात उतरवले आहे. काँग्रेसचे माजी खासदार नवीन जिंदल यांना कुरुक्षेत्र आणि जितीन प्रसाद यांना पीलभीत येथून तिकीट देण्यात आले आहे. भाजपचे केरळमधील प्रदेशाध्यक्ष सुरेंद्र हे वायनाडमधून राहुल गांधी यांच्याविरोधात निवडणूक लढवणार आहेत.