शेअर ट्रेडिंगमध्ये 40 लाखांची फसवणूक; गुजरातमधील चार आरोपींना अटक

आयसी ग्रुप गोल्ड स्टॉक क्लब ए-5 या व्हॉट्सप ग्रुपच्या माध्यमातून शेअर ट्रेडिंगमध्ये अधिक नफा मिळवून देण्याचे आमिष दाखवून एका नागरिकाची 40 लाख रुपयांची फसवणूक करणाऱ्या गुजरात राज्यातील चार आरोपींना नगरच्या सायबर पोलिसांनी अटक केली आहे.

जावेदमाई मोहम्मदभाई सुमारा (वय 40, रा. काजली गाव, ता, वैरावल, जि. गीर सोमनाथ, गुजरात), जिग्नेश मोहनभाई कलसरिया (वय 27, रा. सनोसरी, ता. गिरगढडा, जि. गीर सोमनाथ, गुजरात), महादेव जसुभाई गेडीया (वय 30, रा. शांती विहार सोसायटी, पर्वत पटिया, सुरत, गुजरात) व रवि रामाजीभाई आजगिया (वय 36, रा. शिवदर्शन सोसायटी, कतार ग्राम, सूरत, गुजरात) अशी अटक केलेल्यांची नावे आहेत.

याप्रकरणी सायबर पोलीस ठाण्यात फिर्याद दखल करण्यात आली होती. 19 जून 2024 ते 11 जुलै 2024 या कालावधीत फिर्यादी यांना व्हॉट्सऍप ग्रुपच्या ऍडमिन अनिका शर्मा हिने शेअर ट्रेडिंगमध्ये गुंतवणूक केल्यास अधिक नफा मिळतो, असे सांगून फसवणूक केली. या तक्रारीवरून गुन्हा दखल करण्यात आला.

फिर्यादी यांनी फसवणूक झालेल्या रकमांचे व्यवहार कोटक महिंद्रा बँक, एचडीएफसी बँकमधून केले होते. सायबर पोलिसांनी संबंधित बँक खात्यांचे तांत्रिक विश्लेषणात तपासणी केली असता, सदर बँक खाती जावेदभाई सुमारा व निहेश कलरिया यांच्या नावावर असल्याचे निष्पन्न झाले. महादेव गेडीया व रवि आजगिया या दोघांनी जिग्नेश कलसरिया याला फसवणूक करण्यासाठी बँक खाते उघडण्यास मदत केल्याचे तपासात उघड झाले.

पोलीस अधीक्षक सोमनाथ घार्गे, अपर अधीक्षक वैभव कलुबर्मे यांच्या मार्गदर्शनाखाली निरीक्षक मोरेश्वर पेंदाम, उपनिरीक्षक सुदाम काकडे, अंमलदार अभिजीत अरकल, मोहम्मद शेख, अरुण सांगळे, गणेश पाटील, अप्पासाहेब टिंग, तसेच महिला अंमलदार सविता खताळ यांच्या पथकाने केली आहे.