पाथर्डीच्या विविध बाजारपेठेत बनावट नोटांचा सुळसुळाट

पाथर्डी शहरासह तालुक्यातील अनेक गावच्या व्यापारी पेठेत शंभर व दोनशे रुपयांच्या बनावट नोटा मोठ्या प्रमाणात आल्याने व्यापारी व ग्राहकांच्या अडचणीत वाढ झाली आहे. या बनावट नोटांचा कागद हलका जरी असला तरीही या नोटांचा रंग हुबेहूब बनावट नोटांसारखा असल्याने ग्राहकांना ही नोट खरी की खोटी हे कळणे दुरापास्त झाले आहे.

अनेक व्यावसायिकांनी आपली फसगत होऊ नये म्हणून बनावट नोटा ओळखण्याचे मशीन आपल्या दुकानात लावले आहे. या नोटा नेमकी कुठून आल्या व कोणी आणल्या समजू शकत नाही. तर या संदर्भात कोणीही पोलीस स्टेशनला तक्रार सुद्धा न केल्याने सध्या मात्र अनेकांची फसगत होत आहे. शंभरच्या नोटांचे दहा हजारचे बंडल तर दोनशे रुपयांच्या नोटांचे वीस हजारचे बंडल करून एखाद्या व्यापाऱ्याला दिले तर त्याला या बंडल मधील बनावट नोट नेमकी कोणती आहे हे समजत नसल्याने अनेकांची फसगत होत आहे. शहरातील अनेक तरुण विविध बँका व पतसंस्थांमध्ये दैनिक बचत प्रतिनिधी म्हणून काम करतात. या प्रतिनिधींना सुद्धा रोजच्या कलेक्शन मधून या बनावट नोटा आल्या आहेत.  दुसऱ्या दिवशी बँकेत किंवा पतसंस्थेत पैसे भरण्यासाठी गेल्या नंतर बनावट नोट लक्षात येत असल्याने व ती नेमकी कोणी दिली हे लक्षात न आल्याने अनेकांची फसवणूक झाली आहे. या बनावट नोटा नेमक्या कोणी आणल्या याचा शोध पोलीस प्रशासनाने घ्यावा अशी मागणी व्यापारी वर्गातून होत आहे.

सध्या व्यापारी पेठेत मोठ्या प्रमाणात शंभर व दोनशे रुपयांच्या बनावट नोटा चलनात आल्या असून त्या लवकर ओळखता येत नसल्याने अनेकांची फसगत होत आहे.
श्रीकांत जाजू ,औषध विक्रेते