उदय सामंत एकनाथ शिंदेंची जागा घेण्याच्या तयारीत – विनायक राऊत

उदय सामंत एकनाथ शिंदेंची जागा घेण्याच्या तयारीत आहेत, असं शिवसेना (उद्धव बाळासाहेब ठाकरे) पक्षाचे नेते आणि माजी खासदार विनायक राऊत म्हणाले आहेत. आज जवाहरलाल नेहरू विद्यापीठात (जेएनयू) आज मुख्यमंत्री देवेंद्र फडणवीस यांच्या हस्ते मराठी अध्यासन केंद्राचं उद्घाटन करण्यात आलं. या कार्यक्रमाला उपमुख्यमंत्री एकनाथ शिंदे हेही उपस्थित राहणार होते. मात्र त्यांच्या जागी मुख्यमंत्री फडणवीस यांच्यासोबत उदय सामंत यांनी या कार्यक्रमाला उपस्थिती लावली. याआधीही फडणवीस यांच्यासोबत अनेकवेळा सामंत यांनी दिल्लीवारी केली आहे. यावरच आपली प्रतिक्रिया देताना विनायक राऊत असं म्हणाले आहेत.

माध्यमांशी संवाद साधताना विनायक राऊत म्हणाले की, “एकनाथ शिंदे यांची जागा उदय सामंत घेण्याच्या तयारीत आहेत. याआधीही मुख्यमंत्री देवेंद्र फडणवीस यांच्यासोबत उदय सामंत यांनी अनेकवेळा दिल्लीचे दौरे केले आहेत.”

ते म्हणाले की, ” मुख्यमंत्रीपदावरून एकनाथ शिंदे ज्यावेळी रागावून बसले होते, त्यावेळी उदय सामंत यांनी त्यांच्या पक्षातील 20 आमदारांचा गट तयार करून उपमुख्यमंत्रीपद ताब्यात घेण्याच्या प्रयत्नात होते. त्यामुळे एकनाथ शिंदे यांना यापुढे दिल्लीवारी करणं डोईजड जाणार आहे.”