हट्टीपणा सोडा, हिंदुस्थानशी संबंध सुधारा; मुइज्जू यांना माजी राष्ट्राध्यक्षांचा सल्ला

हिंदुस्थानाने बहिष्कार टाकल्यानंतर मालदीवच्या पर्यटनावर मोठा परिणाम झाला आहे. त्यानंतर मालदीवचे राष्ट्राध्यक्ष मोहम्मद मुइज्जू यांना त्यांच्याच देशात नाराजीचा सामना करावा लागत आहे. अशातच आता मालदीवचे माजी राष्ट्राध्यक्ष इब्राहीन मोहम्मद सोलिह यांनी मुइज्जू यांच्यावर निशाणा साधत हट्टीपणा सोडून हिंदुस्थानसोबतचे संबंध सुधारण्याचा सल्ला दिला आहे.

मालदीवचे माजी राष्ट्राध्यक्ष इब्राहिम मोहम्मद सोलिह यांनी त्यांचे सध्याचे राष्ट्राध्यक्ष मोहम्मद मुइज्जू यांना त्यांच्या ‘हट्टी’पणा सोडा आणि आर्थिक आव्हानांना सामोरे जाण्यासाठी शेजाऱ्यांशी संवाद साधायला हवा असा सल्ला दिला आहे. काही दिवसांपूर्वी चीन समर्थक समजल्या जाणाऱ्या मुइज्जू यांनी हिंदुस्थानला मालदीवला कर्जमाफी देण्याचे आवाहन केले होते तेव्हा सोलिह यांनी ही टिप्पणी केली. माफन्नू यांच्या चार संसदीय मतदारसंघातून निवडणूक लढवणाऱ्या मालदीवियन डेमोक्रॅटिक पार्टीच्या (एमडीपी) उमेदवारांना पाठिंबा मिळवण्यासाठी माले येथे आयोजित कार्यक्रमात सोलिह म्हणाले की, मुइज्जू कर्जाच्या पुनर्गठनाचा विचार करत असल्याचे सूचित करणारे मीडिया रिपोर्ट्स त्यांनी पाहिले आहेत. त्यासाठी त्यांना हिंदुस्थानाशी बोलायचे आहे. मात्र ही आर्थिक आव्हाने हिंदुस्थानच्या कर्जामुळे नाहीत असे सोलिह यांनी म्हंटले आहे.

सोलिह म्हणाले की, मालदीवचे चीनवर 18 अब्ज मालदीवियन रुफिया (एमव्हिआर) कर्ज आहे, तर हिंदुस्थानावर 8 अब्ज एमव्हिआर कर्ज आहे आणि त्याची परतफेड करण्याची मुदत देखील 25 वर्षे आहे. ” मला खात्री आहे की आमचे शेजारी मदत करतील,” तुम्ही हट्टीपणा सोडून बोलणे सुरू केले पाहिजे. आम्हाला मदत करणारे अनेक पक्ष आहेत. पण मुइज्जू यांना तडजोड करायची नाही अशी टीका त्यांनी केली.