शालेय कामकाजाच्या वेळेत शिक्षकांना निवडणूक काम नाही, महानगरपालिका शिक्षक सेनेला न्यायालयीन लढ्यात यश

शिक्षकांना मतदान केंद्रस्तरीय अधिकारी (बीएलओ) म्हणून डय़ुटी लावल्याने विद्यार्थ्यांचे होणारे शैक्षणिक नुकसान लक्षात घेत उच्च न्यायालयाने महत्त्वपूर्ण निर्णय दिला आहे. शालेय कामकाजाच्या वेळेत शिक्षकांना निवडणूक काम न देण्याचे निर्देश न्यायालयाने राज्य सरकार आणि निवडणूक आयोगाला दिले आहेत. मुंबई महानगरपालिका शिक्षक सेनेने दिलेल्या न्यायालयीन लढ्याला यश आल्याने शिक्षकांना दिलासा मिळाला आहे.

2024च्या लोकसभा निवडणुकीसाठी शिक्षकांना बीएलओची डय़ुटी बंधनकारक करीत पालिकेच्या शिक्षण विभागाने तीन परिपत्रके जारी केली होती. त्या परिपत्रकांना आव्हान देत मुंबई महानगरपालिका शिक्षक सेनेने याचिका दाखल केली होती. त्यावर उच्च न्यायालयाने शिक्षकांच्या बाजूने निर्णय दिला. सुनावणीदरम्यान केंद्रीय निवडणूक आयोगाने सेंट मेरी स्कूल प्रकरणातील सर्वोच्च न्यायालयाच्या आदेशांचे पालन केले जाईल, शिक्षकांना सुट्टीच्या दिवशी, शालेय कामकाजाच्या वेळेव्यतिरिक्त निवडणूक डय़ुटी दिली जाईल, अशी हमी दिली.

उच्च न्यायालयाच्या निर्णयाचे मुंबई महानगरपालिका शिक्षक सेनेने सोमवारी पत्रकार परिषद घेऊन स्वागत केले. न्यायालयाने शिक्षकांसाठी दिलासादायक निर्णय दिला. आम्ही सुट्टीच्या दिवसांत काम करण्यास तयार आहोत. त्या बदल्यात पर्यायी रजा मिळाली पाहिजे, अशी अपेक्षा शिक्षक सेनेचे अध्यक्ष के. पी. नाईक यांनी व्यक्त केली. पत्रकार परिषदेला सरचिटणीस हणमंत देसाई, हरीष गिरीगोसावी, सुरेंद्र वाघ, संतोष गंगावणे, महिला आघाडीप्रमुख दर्शना राऊत आदी उपस्थित होते.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.