Savali Bar Mumbai – गृहराज्यमंत्री योगेश कदम यांच्या आईच्या नावे डान्स बार; FIR मधून सत्य उघड

गृहराज्यमंत्री योगेश कदम यांच्यावर विधान परिषदेत शिवसेनेचे (उद्धव बाळासाहेब ठाकरे) आमदार अनिल परब यांनी आरोप केले होते. गृहराज्यमंत्र्यांच्या आईच्या नावे मुंबईत सावली बारचा परवाना असल्याचा आणि त्या बारवर पोलिसांनी अश्लील नृत्य प्रकरणी कारवाई केल्याचा आरोप परब यांनी केला होता. या ठिकाणी पोलिसांनी छापा मारला. मुली ताब्यात घेतल्या. हा डान्सबार आहे, असा दावा परब यांनी केला होता. या प्रकरणी FIR दाखल झाला आहे. त्यात नेमके काय आहे, जाणून घेऊ.

हा बारचा परवाना ज्योती रामदास कदम यांच्यानावे असल्याचा जबाब मॅनेजरने दिला होता. 30 मे या दिवशी या बारवर रात्री पोलिसांनी कारवाई केली. अश्लील नृत्य प्रकरणी ही कारवाई करण्यात आली होती. एफआयआर कॉपीमध्ये नमूद माहितीनुसार 22 बारबाला, 25 ग्राहक, वेटर कॅशियर आणि मॅनेजरला या छापेमारी मध्ये ताब्यात घेण्यात आले होते. 30 मे च्या रात्री 10.50 ते पहाटे 4 वाजेपर्यंत बारवर धाड टारत कारवाई करण्यात आली. त्यात 22 बारबाला, 25 ग्राहक आणि तीन कर्मचारी होते. काही बार बाला आणि ग्राहक अश्लील नृत्य करत असल्याचे निदर्शनास आले होते. छाप्यानंतर वेटर,कॅशियर आणि मॅनेजर पोलिसांच्या ताब्यात घेण्यात आले. बारचा परवाना ज्योती रामदास कदमांच्या नावे असल्याचा मॅनेजरचा जबाब आहे. धाडीनंतर समता नगर पोलीस ठाण्यात गुन्हा दाखल करण्यात आला. धाडीनंतर म्हणजे 31 मे पासून सावली बार बंद आहे. ‘सावली बार’ माझी पत्नी ज्योती कदम यांच्या मालकीचा आहे, अशी कबूली माजी मंत्री आणि शिंदे गटाचे ज्येष्ठ नेते रामदास कदम यांनी दिली. बारची मालकी पत्नीच्या नावे असली तरी चालवणारा दुसराच आहे. नियमानुसार बार चालवणाऱ्यावर कारवाई होत असते, असं रामदास कदम म्हणाले.

विधानपरिषदेत अंतिम आठवडा प्रस्तावावर अनिल परब यांनी याबाबतचा आरोप केला. अनिल परब म्हणाले की, कांदिवली येथे सावली बार आहे. इथे पोलिसांनी धाड टाकली. त्यावेळी 22 बारबाला पकडल्या गेल्या. 22 बारबाला 22 कस्टमर आणि 4 कर्मचाऱ्यांना पकडण्यात आले. या ठिकाणी कस्टमरवर गुन्हा दाखल झाला. या ठिकाणी पोलिसांनी पंचनामा केला. त्या बारचे परमिट हे ज्योती रामदास कदम यांच्या नावे आहे. त्या गृहमंत्र्यांच्या मातोश्री आहेत, असे अनिल परब यांनी म्हटले. एकीकडे लाडक्या बहिणीचा तुम्हाला आशीर्वाद आहे आणि दुसरीकडे तुम्ही आया बहिणीना डान्सबारमध्ये नाचवता? आजच्या आज गृहराज्यमंत्री यांचा राजीनामा घ्यावा, अशी मागणीही अनिल परब यांनी केली होती.