सीबीएसईच्या 2200 पानी इतिहासाच्या पुस्तकात केवळ 68 शब्द छत्रपती शिवाजी महाराजांसाठी आहेत. हे अपमानास्पद आहे, असा रोष व्यक्त करत आमदार सत्यजित तांबे यांनी सरकारवर ताशेरे ओढले. सीबीएसईच्या अभ्यासक्रमात छत्रपती शिवाजी महाराजांबाबत होत असलेल्या दुर्लक्षावरून विधान परिषदेत सदस्यांनी तीव्र संताप व्यक्त केला.
‘सीबीएसई’ अभ्यासक्रमात छत्रपती शिवाजी महाराज यांच्यावरील इतिहासाचे लेखन अपुरे असल्याबाबत सदस्य सत्यजित तांबे यांनी विधान परिषदेत प्रश्न विचारला होता. तांबे म्हणाले, पहिली ते दहावीपर्यंत सीबीएससीच्या इतिहासाची 2200 पाने आहेत. त्यात छत्रपती शिवाजी महाराजांवर फक्त 68 शब्दच असणे हे निषेधार्थ आहे. छत्रपती शिवाजी महाराजांचा इतिहास महाराष्ट्रातल्या मुलांपर्यंत गेला पाहिजे. सीबीएससीच्या माध्यमातून देशातल्या मुलांपर्यंत गेला पाहिजे. राज्य सरकारने सीबीएसईच्या अभ्यासक्रमात एनसीईआरटीमार्फत छत्रपती शिवाजी महाराजांचा समावेश व्हावा असा प्रस्ताव पाठवला आहे, पण इतक्या गंभीर मुद्दय़ावर केवळ प्रस्ताव पाठवून सरकारने हात झटकले आहेत. याप्रकरणी शिक्षणमंत्र्यांनी स्वतः दिल्लीला जाऊन चर्चा केली पाहिजे होती. मात्र या प्रकरणाबाबत सरकार उदासीन आहे, असा आरोप तांबे यांनी केला.
दरम्यान, शिक्षणमंत्री दादा भुसे यांनी केंद्रीय मंत्री यांना भेटून सविस्तर व अभ्यासपूर्ण इतिहासाचा समावेश करण्याची विनंती केली आहे. त्यांनी अभ्यासक्रम समाविष्ट करण्याबाबत आश्वासन दिले आहे. पुढील काळात यासंदर्भात पाठपुरावा करण्यात येईल, अशी माहिती राज्यमंत्री पंकज भोयर यांनी दिली.
शिष्टमंडळ घेऊन पाठपुरावा करावा!
सीबीएसईचा पॅटर्न हा कित्येक वर्षांपासून आपण आपल्या इंग्रजी शाळांमध्ये राबवत आहोत. अजूनही शिवाजी महाराजांचा इतिहास विद्यार्थ्यांपर्यंत पोहोचलेला नाही. ही मोठी गंभीर बाब आहे. सीबीएसईच्या अभ्यासक्रमात किती दिवसांत अभ्यासक्रम समाविष्ट करणार, असा सवाल भावना गवळी यांनी केला. दिल्लीत धर्मेंद्र प्रधान मंत्री आहेत. त्यामुळे सरकारने शिष्टमंडळ घेऊन जाऊन तातडीने पाठपुरावा करावा, असेही त्या म्हणाल्या.
Comment List