नालासोपाऱ्यातील पोलीस ठाण्यात ढिश्युम…ढिश्युम… परस्पर तक्रार द्यायला आलेले एकमेकांना भिडले

परस्परविरोधी तक्रार देण्यासाठी आलेल्या दोन गटात भर पोलीस ठाण्यातच ढिश्युम ढिश्युम झाल्याची घटना नालासोपाऱ्यात घडली आहे. तुळींज पोलीस ठाण्यात ही घटना घडली असून व्हिडीओ व्हायरल झाला आहे. यात दोन्ही गट एकमेकांना अर्वाच्य शिवीगाळ करतानाच एकमेकांना लाथाबुक्क्यांनी मारहाण करत आहेत. पोलीस हा वाद सोडवण्याचा प्रयत्न करत असतानाही राडेबाज ऐकण्याच्या मनःस्थितीत नव्हते. त्यामुळे पोलिसांचा धाकच राहिला नसल्याची टीका नागरिकांनी केली आहे.

नालासोपारा नेहमीच या ना त्या कारणाने चर्चेत असतो. पोलिसांचा धाक न राहिल्याने परिसरात क्राइम रेटदेखील वाढला आहे. त्यातच तुळींज पोलीस ठाण्यात दोन गटात जोरदार हाणामारी झाल्याची घटना घडली आहे. प्रगतीनगरमधील नील सोसायटीत राहणाऱ्या मोहम्मद यांनी त्यांचे 1200 रुपयांचे पाण्याचे बिल भरले नव्हते. यावरून जाब विचारल्याने शेख आणि याच सोसायटीतील गुलाबसा खान व अन्य आठ जणांमध्ये वाद झाला होता. याबाबत दोन्ही गट परस्परांविरोधात तक्रार करण्यासाठी पोलीस ठाण्यात आले होते, परंतु पाहता पाहता दोन्ही गट एकमेकांच्या अंगावर धावून गेले. अचानक घडलेल्या या घटनेने पोलिसांची चांगलीच तारांबळ उडाली. या प्रकरणाचा व्हिडीओ सोशल मीडियावर व्हायरल झाला असून पोलिसांच्या कार्यक्षमतेवरच प्रश्नचिन्ह उपस्थित केले जात आहे.

पोलिसांची माहिती देण्यास टाळाटाळ

घटनेची माहिती मिळताच प्रसारमाध्यमांच्या प्रतिनिधींनी तुळींज पोलीस ठाण्यात दूरध्वनी करून माहिती घेण्याचा प्रयत्न केला. मात्र अजून एफआयआर दाखल करण्याचे काम सुरू आहे, नंतर सांगतो असे सांगत सुरुवातीला राडेबाज आरोपींची नावे सांगण्यास टाळाटाळ केली.