सर्वोच्च न्यायालयाच्या आदेशाचा अवमान; जितेंद्र आव्हाड यांचा अजित पवार गटावर आरोप

निवडणूक आयोगाने राष्ट्रवादी पक्ष आणि चिन्ह अजित पवार गटाला दिले आहे. निवडणूक आयोगाच्या निर्णयाला राष्ट्रवादी काँग्रेस शरदचंद्र पवार पक्षाने सर्वोच्च न्यायालयात आव्हान दिले होते. या प्रकरणाच्या सुनावणीवेळी न्यायालयाने आगामी निवडणुकीसाठी अजित पवार गटाला सशर्त घड्याळ चिन्ह वापरायला परवानगी दिली आहे. तर शरद पवार यांच्या पक्षाला तुतारी वाजवणार माणूस हे चिन्ह देण्यात आले आहे. सर्वोच्च न्यायालयाने अजित पवार गटाला त्यांच्या चिन्हाखाली एक टिप्पणी लिहायला सांगितली आहे. अजित पवार गटाने प्रसिद्ध केलेल्या जाहिरातीत टिप्पणी नसल्याने सर्वोच्च न्यायालयाच्या आदेशाचा अवमान झाल्याचा आरोप जितेंद्र आव्हाड यांनी केला आहे.

अजित पवार गटाने इंग्रजी, हिंदी आणि मराठी माध्यमांमध्ये नोटीस जारी करावी आणि प्रचाराच्या सर्व जाहिरातींमध्ये असे नमूद करावं की, त्यांना निवडणूक आयोगाने दिलेलं ‘घड्याळ’ हे चिन्ह आणि राष्ट्रवादी हे पक्षनाव याबाबतचे प्रकरण हे न्यायप्रविष्ट आहे, असे आदेश सर्वोच्च न्यायालयाने दिले आहेत. अजित पवार गटाकडून प्रसारमाध्यमात जाहिरात देण्यात आल्या आहेत, त्यावरून आव्हाड यांनी ट्विट करत आरोप केले आहेत.

आज राष्ट्रवादी काँग्रेसच्या अजित पवार गटाने प्रसारीत केलेल्या जाहिरातींमधील शब्दांचा सर्वोच्च न्यायालयाच्या टीप्पणीचा कुठेही शाब्दिक संदर्भ दिसून येत नाही. सर्वोच्च न्यायालयाने आपल्या आदेशात ज्या बाबी न्यायालयाने नमूद केल्या नव्हत्या; त्या बाबी जाहिरातीमध्ये नमूद करून सर्वोच्च… pic.twitter.com/jtY4DY48EE

— Dr.Jitendra Awhad (@Awhadspeaks) March 24, 2024

आव्हाड यांनी एक्सवरील पोस्टमध्ये म्हटले आहे की, आज राष्ट्रवादी काँग्रेसच्या अजित पवार गटाने प्रसारीत केलेल्या जाहिरातींमधील शब्दांचा सर्वोच्च न्यायालयाच्या टीप्पणीचा कुठेही शाब्दिक संदर्भ दिसून येत नाही. सर्वोच्च न्यायालयाने आपल्या आदेशात ज्या बाबी न्यायालयाने नमूद केल्या नव्हत्या; त्या बाबी जाहिरातीमध्ये नमूद करून सर्वोच्च न्यायालयाचे आदेश धाब्यावर बसवून अवमानच केला आहे. सर्वोच्च न्यायालयाचाही सन्मान करण्यात येत नसेल तर याला सत्तेची मग्रुरी नाही तर काय म्हणायचे? असा सवालही आव्हाड यांनी ट्विटमध्ये केला आहे.