विटस् हॉटेल खरेदी प्रकरणात अडचणीत सापडलेले शहा सेनेचे मंत्री संजय शिरसाट यांना आयकर विभागाने नोटीस बजावली आहे. त्यापाठोपाठ शिरसाट यांचा नोटांनी भरलेली बॅग आणि हातात सिगारेट धरत फोनवर बोलतानाचा बेडरूममधील एक व्हिडीओ समोर आल्याने एकच खळबळ उडाली आहे.
शिवसेना नेते-खासदार संजय राऊत यांनी आज हा व्हिडीओ एक्सवर पोस्ट केला. त्यानंतर हा माझाच बेडरूम असल्याचे शिरसाट यांनी मान्य केले. मात्र त्या बॅगमध्ये पैसे नाहीत तर कपडे आहेत, असे स्पष्टीकरण शिरसाट यांनी दिले.
शिरसाट यांच्या मालमत्तेत मागील पाच वर्षांत 12 पट वाढ झाल्याबाबत आयकर विभागाने त्यांना नोटीस बजावत स्पष्टीकरण मागितले आहेत. त्यातच समोर आलेल्या या व्हिडीओमुळे शिरसाट गोत्यात आले आहेत.
हिंमत असेल तर ती रूम माध्यमांना दाखवा – अंजली दमानिया
बॅगमध्ये चक्क पैसे दिसत असताना, ते पैसे नाही, कपडे असतील असे शिरसाट म्हणूच कसे शकतात? हा माझ्या घरच्या व्हिडीओ आहे, असे स्वतःच म्हणत आहेत. त्यांच्यात हिंमत असेल आणि ते खरं बोलत असतील तर आजच त्यांनी माध्यमांना घरी नेऊन व्हिडीओमध्ये दिसणारी रूम दाखवावी, असे सामाजिक कार्यकर्त्या अंजली दमानिया यांनी म्हटले आहे.
Comment List