निवडणूक आयोगाने राष्ट्रवादी पक्ष आणि चिन्ह अजित पवार गटाला दिले आहे. निवडणूक आयोगाच्या निर्णयाला राष्ट्रवादी काँग्रेस शरदचंद्र पवार पक्षाने सर्वोच्च न्यायालयात आव्हान दिले होते. या प्रकरणाच्या सुनावणीवेळी न्यायालयाने आगामी निवडणुकीसाठी अजित पवार गटाला सशर्त घड्याळ चिन्ह वापरायला परवानगी दिली आहे. तर शरद पवार यांच्या पक्षाला तुतारी वाजवणार माणूस हे चिन्ह देण्यात आले आहे. सर्वोच्च न्यायालयाने अजित पवार गटाला त्यांच्या चिन्हाखाली एक टिप्पणी लिहायला सांगितली आहे. अजित पवार गटाने चिन्हाखाली लिहिलेल्या सूचनेवरून रोहित पवार यांनी अजित पवार गटावर निशाणा साधला आहे.
“भारत निवडणूक आयोगाने अजित अनंतराव पवार यांच्या नेतृत्त्वाखालील राष्ट्रवादी काँग्रेस पक्षाला घड्याळ चिन्ह दिले आहे. हे प्रकरण सध्या माननीय सर्वोच्च न्यायालयासमोर आहे आणि अंतिम निकालाच्या अधीन राहून माननीय सर्वोच्च न्यायालयाने मध्यंतरी राष्ट्रवादी काँग्रेसला आगामी सर्व निवडणुकांसाठी घड्याळ निवडणूक चिन्ह वापरण्याची परवानगी दिली आहे”, अशी सूचना अजित पवार गटाने त्यांच्या चिन्हाखाली लिहिली आहे.
या सूचनेचा उल्लेख करत रोहित पवारांनी एक्सवर पोस्ट केली आहे. रोहित पवार म्हणाले, “या निवेदनातील पहिलं वाक्य खरं असलं तरी लाल चौकटीतील अर्ध वाक्य अधिक सत्य आहे. कारण अंतिम निकालात न्यायालयाने परवानगी दिली तरच घड्याळ चिन्ह पुढे वापरता येईल, अन्यथा घड्याळ तर जाईलच पण वेळ कशी येईल याचा अंदाज लोकांचा विरोध बघता आजच येतोय. राजकारणाला अशा अटी लागू होत असतील तर याचं दुःख वाटतं. पण विचार बदलल्यामुळे आणि ज्याचं राजकारणच विरोधी पक्षाला संपवण्याच्या अटीवर चालतं त्यांच्यासोबत गेल्याने ही वेळ आली, हे नाकारता येणार नाही!”, असे रोहित पवार यांनी आपल्या पोस्टमध्ये म्हटले आहे. या पोस्टद्वारे रोहित पवार यांनी अजित पवार गटाला चांगलाच टोला लगावला आहे.
.jpeg)
Comment List