इस्लामी दहशतवाद्यांचा रशियावर हल्ला, 115 ठार

रशियाची राजधानी मॉस्कोमधील प्रचंड गर्दी असलेल्या कॉन्सर्ट हॉलमध्ये दहशतवाद्यांनी शुक्रवारी मध्यरात्री केलेल्या भीषण हल्ल्यात 115 निष्पाप नागरिकांचा मृत्यू झाला, तर 145 जण गंभीर जखमी झाले असून यातील 60 जणांची प्रकृती चिंताजनक आहे. मध्यरात्री कॉन्सर्ट हॉलमध्ये शिरलेल्या सात दहशतवाद्यांनी अंदाधुंद गोळीबार करीत स्फोटकेही फोडली. घटनेमुळे संपूर्ण देश हादरला असून या हल्ल्याची जबाबदारी इस्लामिक स्टेट गुपने घेतली
आहे.

मॉस्कोमध्ये म्युझिक कॉन्सर्टसाठी मध्यरात्री हजारोंच्या संख्येने नागरिकांनी गर्दी केली होती. यावेळी सहा ते सात दहशतवादी अचानक या ठिकाणी पोहोचले. दहशतवाद्यांनी हॉलचे दरवाजे बंद करीत एकाच वेळी गोळीबार सुरू केला. त्यांनी आधी सुरक्षारक्षकांवर हल्ला केला. दहशतवादी तब्बल 15 ते 20 मिनिटे गोळीबार करीत होते. यानंतर कॉन्सर्ट हॉलमध्ये स्फोटके फोडली. यामुळे हॉलमध्ये भीषण आग लागल्याने एकच हाहाकार उडाला. नागरिकांनी मिळेल त्या दिशेने धाव घेण्याचा प्रयत्न केला, मात्र हल्ल्यामध्ये अनेक जण जखमी झाले. त्यांच्यावर रुग्णालयात उपचार सुरू आहेत.

दहशतवाद्यांविरोधात ऑपरेशन सुरू!
– हल्ला झालेल्या कॉन्सर्ट हॉलमध्ये काही जण अडकल्याने रशियन सैन्याकडून त्यांना रेस्क्यू करण्याचे काम केले जात आहे. दहशतवाद्यांविरोधात ऑपरेशन सुरू करण्यात आले असून हॅलिकॉप्टरचीही मदत घेण्यात येत आहे.

– आतापर्यंत चार दहशतवाद्याला पकडण्यात यश आले. हल्ल्याच्या पार्श्वभूमीवर मॉस्कोत कडक सुरक्षा ठेवण्यात आली असून शहरातील सर्व सिनेमागृहे, संग्रहालये बंद ठेवण्यात आली आहेत.