खारघरमध्ये पालकांचा आरटीई प्रवेश घोटाळा, वास्तव्याचे बोगस पुरावे दिले; 24 जणांवर गुन्हे दाखल

बालकांचा मोफत आणि सक्तीचा शिक्षण अधिकार कायद्यांतर्गत (आरटीई) शाळेत प्रवेश घेण्यासाठी खारघरमध्ये मोठा घोटाळा झाल्याचे उघडकीस आले आहे. आरटीई अंतर्गत प्रवेश देताना शिक्षण विभागाकडून शाळेच्या एक किलोमीटरच्या परिघात राहणाऱ्या पाल्यांना प्राधान्य दिले जाते. याचाच गैरफायदा काही पालकांनी घेतला असून त्यांनी वास्तव्याचे पुरावे बोगस दिले आहेत. पालकांचा हा प्रवेश घोटाळा उघडकीस आल्यानंतर पनवेल शहर पोलिसांनी यांप्रकरणी 24 पालकांवर गुन्हे दाखल केले आहेत.

24 जणांवर गुन्हे दाखल
खारघरमध्ये राहणाऱ्या काही पालकांनी वास्तव्याच्या खोट्या कागदपत्रांच्या आधारे आपल्या पाल्यांचे आरटीईअंतर्गत प्रवेश घेतले आहेत. याप्रकरणी प्राथमिक तपासणी झाली असता ही धक्कादायक बाब उघडकीस आली आहे. महाराष्ट्र राज्य शिक्षण संचालनालयाच्या वतीने 13 जानेवारी रोजी विनाअनुदानित शाळांमध्ये आरटीईअंतर्गत 25 टक्के प्रवेश प्रक्रिया ऑनलाइन पद्धतीने पार पडली होती. शाळेपासून एक किलोमीटर अंतरात वास्तव्यास असलेल्या पाल्यांना आरटीईअंतर्गत 25 टक्के प्रवेशास प्राधान्य देण्यात आले आहे. याचाच गैरफायदा घेत काही पालकांनी शाळेच्या एक किमी अंतरामध्ये राहत नसतानाही बनावट वास्तव्याची कागदपत्रे तयार करून त्याद्वारे आरटीईअंतर्गत पाल्यांचे प्रवेश घेतले.

बनावट प्रवेश झाल्याचे उघडकीस आल्यानंतर एकच खळबळ उडाली आहे. त्यामुळे पनवेल तालुक्यातील सर्व विनाअनुदानित शाळींमध्ये आरटीई अंतर्गत प्रवेश मिळवलेल्या पाल्यांच्या पालकांनी सादर केलेल्या वास्तव्याच्या पुराव्याची पडताळणी करून त्याचा अहवाल सादर करण्याचे निर्देश पनवेल पंचायत समितीचे गटशिक्षण अधिकारी सीताराम मोहिते यांनी दिले होते.

खारघरमधील रामशेठ ठाकूर पब्लिक स्कूल, विश्वज्योत विद्यालय आणि विग्बोर शाळेत आरटीईअंतर्गत प्रवेश मिळवणाऱ्या पाल्यांच्या पालकांनी सादर केलेल्या वास्तव्याच्या पुराव्यांची पडताळणी करून अहवाल सादर केला होता. या अहवालामध्ये 24 पालकांनी बनावट पत्ता दाखवत आपल्या पाल्याचा प्रवेश निश्चित केल्याचे आढळले आहे.

बनवाबनवी करणाऱ्यांचे धाबे दणाणले
वास्तव्याच्या बनावट कागदपत्रांद्वारे आरटीईअंतर्गत प्रवेश घेऊन सरकारची फसवणूक करणाऱ्या 24 पालकांवर तसेच त्यांना बनावट कागदपत्रे तयार करून देण्यास मदत करणाऱ्यांविरोधात फसवणूक, बनावट दस्तऐवज तयार करणे व सरकारची दिशाभूल केल्याप्रकरणी गुन्हा दाखल करण्यात आला आहे. पनवेल पोलिसांच्या चौकशीचा ससेमिरा मागे लागल्यामुळे बनवाबनवी करणाऱ्या पालकांचे धाबे दणाणले आहेत.

Tags:

About The Author

Manisha Thorat- Pisal

सौ. मनिषा-थोरात-पिसाळ गेल्या १२ वर्षांपासून पत्रकारिता क्षेत्रात कार्यरत आहेत. ‘‘न्यूज एक्सप्रसे मराठी’’ या पुणे जिल्ह्यातील आघाडीच्या न्यूज पोर्टलच्या कार्यकारी संपादक म्हणून जबाबदारी सांभाळत आहेत. सामाजिक, राजकीय, शैक्षणिक आणि औद्योगिक क्षेत्रातील विविध समाजपयोगी उपक्रमांमध्ये त्यांनी योगदान दिले आहे.