तुमचे मुख्यमंत्री खंबीर आहेत, डगमगणार नाही; सुनीता केजरीवाल यांची पोस्ट

कथित मद्यधोरण घोटाळाप्रकरणी दिल्लीचे मुख्यमंत्री अरविंद केजरीवाल यांना ईडीने अटक केली आहे. केजरीवाल यांना न्यायालयाने 28 मार्चपर्यंत ईडी कोठडी सुनावली आहे. केजरीवाल यांच्या अटकेनंतर त्यांच्या पत्नी सुनीता केजरीवाल यांनी पत्रकार परिषद घेत केजरीवाल यांचा निरोप जनतेपर्यंत पोहचवला आहे. तुमचे मुख्यमंत्री खंबीर आहेत, ते डगमगणार नाहीत. त्यांचा प्रत्येक क्षण देसासाठी समर्पित आहे, असे सुनीता केजरीवाल यांनी सांगितले.

सुनीता केजरीवाल यांनी याबाबत पोस्ट केली आहे, त्यात म्हटले आहे की, तुम्ही तीन वेळा निवडून दिलेल्या मुख्यमंत्र्यांना मोदीजींनी सत्तेच्या अहंकारातून अटक करायला लावली. ते सर्वांना नष्ट करण्याचा प्रयत्न करीत आहेत. हा दिल्लीतील जनतेचा विश्वासघात आहे. तुमचे मुख्यमंत्री नेहमीच तुमच्या पाठीशी उभे राहिले आहेत. आत असो वा बाहेर, त्यांचे जीवन देशासाठी समर्पित आहे. जनता जनार्दनला सगळं काही माहीत आहे.’ असे त्यांनी ट्विटमध्ये म्हटले आहे.

आपके 3 बार चुने हुए मुख्यमंत्री को मोदीजी ने सत्ता के अहंकार में गिरफ़्तार करवाया।सबको crush करने में लगे हैं। यह दिल्ली के लोगो के साथ धोखा है।आपके मुख्यमंत्री हमेशा आपके साथ खड़े रहें हैं।अंदर रहें या बाहर, उनका जीवन देश को समर्पित है।जनता जनार्दन है सब जानती है।जय हिन्द

— Sunita Kejriwal (@KejriwalSunita) March 22, 2024

केजरीवाल यांनी दिलेल्या संदेशात म्हटले आहे की, माझा जन्म संघर्षासाठीच झाला आहे. आता जनतेने सतर्क राहून देशविरोधी शक्तीविरोधात एकत्र यावे. आपला देश महान आहे. देशवासियांमध्ये ताकद आहे. फक्त सगळ्यांनी एकत्र येत देशविरोधी शक्तींविरोधात उभे ठाकायला हवे. तसेच आता तुरुंगात आहे, तर मी दिलेली आश्वासने पूर्ण होणार की नाही, याची चिंता करू नका, अशा कोणताही तुरुंग नाही, जो मला डांबून ठेऊ शकेल. मी खंबीर आहे, डगमगणार नाही. मी लवकरच तुरुंगातून बाहेर येईन आणि दिलेली आश्वासने पूर्ण करणार आहे. तसेच जनतेची कामे होणे गरजेचे आहे. त्यामुळे भाजपचा द्वेष करू नका. जनतेच्या कामात अडथळा निर्माण होईल, असे काहीही करू नका, असे आवाहनही केजरीवाल यांनी पक्ष कार्यकर्त्यांना केले आहे.