हिंदी सक्ती आणि त्रिभाषा सूत्राविरोधात येत्या 5 जुलै रोजी मुंबईमध्ये शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे एकत्र मोर्चा काढत आहेत. मराठी माणसाला यामुळे जिकडे तिकडे बळ मिळताना दिसत आहे. त्यामुळे संपूर्ण राज्यभरात या मोर्चाची उत्कंठा लागून राहिली आहे. कोल्हापूरही त्याला अपवाद राहिले नाही.
कोल्हापूरचे प्रसिद्ध शिवशाहीर दिलीप सावंत यांनी तर या मोर्चावर “मुंबईत निघणार मराठीयांचा मोर्चा… सरकारा सांभाळा तुमच्या खुर्च्या ” हा पोवाडा रचून, सरकारला झटका देत, मराठी माणसांच्या मनगटात ताकद निर्माण करण्याचा प्रयत्न केला आहे. मुंबईमध्ये मोर्चात जाऊन पोवाडा सादर करण्याचाही त्यांचा मानस असून, तत्पूर्वी व्हिडीओतून सोशल मीडियाच्या माध्यमातून हा पोवाडा व्हायरल करण्यात येत असल्याचे शाहीर दिलीप सावंत यांनी दैनिक सामनाशी बोलताना सांगितले.
मुंबईत निघणार मराठीयांचा मोर्चा
सरकारा सांभाळा तुमच्या खुर्च्या
मराठी माणूस आता हो लढणार
मुंबईत वादळथेट धडकणार
साऱ्या जगात एकच चर्चा
सरकार सांभाळा तुमच्या खुर्च्या
हिंदीची सक्ती नाही हो चालणार
मराठे अन्याय सहन नाही हो करणार
तुम्हा झोंबणार कोल्हापूरच्या मिरच्या
सरकार सांभाळा तुमच्या खुर्च्या
पहिलीचौथी मुलांवर किती हे ओझे
हिंदी लादून खाता का मताचे खाजे
शिक्षणमंत्री वाटू नका पर्च्या
सरकार सांभाळा तुमच्या खुर्च्या
धमन्यात भिनलया शिवाजी राजं
संयुक्त लढ्याच रक्त आहे ताजं
बाता करू नका आता वरच्या
सरकार सांभाळा तुमच्या खुर्च्या
ठाकरे बधूंचा आवाज घूमणार
मराठी माणूस बाहेर पडणार
कशा पाई वेळ करता खर्च्या
सरकार साभांळा तुमच्या खुर्च्या
Comment List