हिंदुस्थान पाकिस्तान सीमेजवळ सापडला तरुणाचा आणि अल्पवयीन मुलीचा मृतदेह, पाकिस्तानी ओळखपत्र आणि सिमकार्डही आढळले

राजस्थानमधील जैसलमेर जिल्ह्यात हिंदुस्थान-पाकिस्तान सीमेच्या जवळ एक तरुण आणि एका अल्पवयीन मुलीचा मृतदेह आढळला आहे. जिल्ह्याचे पोलीस अधीक्षकांनी याबाबात ही माहिती दिली आहे. घटनास्थळी पाकिस्तानी सिम कार्ड आणि एक ओळखपत्रही सापडले आहे. हे मृतदेह जैसलमेरच्या साधेवाला भागात, हिंदुस्थान-पाक सीमेजवळ सापडले. मृतांमध्ये एक 18 वर्षांचा तरुण आणि 15 वर्षांची अल्पवयीन मुलगी आहे. मृतदेहांची अवस्था पाहता त्यांचा मृत्यू सुमारे सात दिवसांपूर्वी झाला असावा असा अंदाज व्यक्त केला जात आहे. हे मृतदेह हिंदुस्थान-पाक सीमारेषेपासून 10-12 किलोमीटर आत, हिंदुस्थानी हद्दीत आढळले आहेत.

पाकिस्तानी सिम कार्ड आणि ओळखपत्र मिळाल्यामुळे सुरक्षा यंत्रणा सतर्क झाल्या आहेत. ओळखपत्रावरून तरुणाचे नाव रवी कुमार (वय 18 वर्षे) असल्याचे समजते. माहिती मिळताच पोलीस आणि बीएसएफचे अधिकारी घटनास्थळी पोहोचले आणि मृतदेह रामगड येथील सीएचसी रुग्णालयाच्या शवागृहात पाठवला आहे. जैसलमेरचे एसपी सुधीर चौधरी यांनी सांगितले की हा प्रकार अतिशय संवेदनशील असून या प्रकरणाचा सर्व बाजूंनी तपास सुरू आहे. घटनास्थळाजवळील गावांमध्येही चौकशी सुरू करण्यात आली आहे. प्राथमिक तपासात मृतदेहाजवळ कोणतेही शस्त्र किंवा विष सापडलेले नाही. या दोघांचा मृत्यू नेमका कशामुळे झाला हे शवविच्छेदनानंतरच कळेल असे पोलिसांनी सांगितले आहे.

पाकिस्तानी सिमकार्ड आणि ओळखपत्र सापडल्यामुळे अनेक प्रश्न निर्माण झाले आहेत. हा प्रेमप्रकरणाचा प्रकार आहे का? घुसखोरीची तयारी होती का? की काही मोठी कट रचला जात होता. ? हे दोघं हिंदुस्थानी हद्दीत काय करत होते, हे अद्याप स्पष्ट झालेलं नाही. पोलीस आणि सैन्य याचा शोध घेत आहेत.