पाकिस्तानच्या खैबर पख्तुनख्वा प्रांतात शनिवारी झालेल्या आत्मघाती हल्ल्यात 13 सैनिकांचा मृत्यू झाला. तर 10 सैनिक गंभीर जखमी झाले आहेत. उत्तर वझिरीस्तानच्या वायव्य जिल्ह्यातून लष्करी ताफा जात असताना हा हल्ला झाला. हा भाग अफगाणिस्तानच्या सीमेजवळ आहे. सध्या या भागात तणाव असून दहशतवादी हल्ल्यांच्या घटनेत वाढ झाली आहे.
या हल्ल्यात आत्मघाती हल्लेखोराने स्फोटकांनी भरलेले वाहन ताफ्यावर आदळले. त्यामुळे मोठा स्फोट झाला. आतापर्यंत कोणत्याही संघटनेने या हल्ल्याची जबाबदारी घेतलेली नाही. मात्र, तहरीक-ए-तालिबान पाकिस्तान किंवा त्याच्याशी संबंधित दहशतवादी गटाने हा हल्ला केल्याची शक्यता वर्तवण्यात येत आहे. या हल्ल्यानंतर लष्कर आणि सुरक्षा दलांना परिसरात शोधमोहीम सुरू केली आहे. तसेच जखमींना जवळच्या लष्करी रुग्णालयात दाखल करण्यात आले आहे.
2025 च्या जागतिक दहशतवाद निर्देशांकाच्या अहवालानुसार 2024 मध्ये पाकिस्तानमध्ये दहशतवादी हल्ल्यांमुळे होणाऱ्या मृत्यूंची संख्या मोठ्या प्रमाणात वाढली आहे. या वाढीमुळे पाकिस्तान आता जगातील दहशतवादाने सर्वाधिक प्रभावित देशांमध्ये दुसऱ्या क्रमांकावर आला आहे. अहवालात म्हटले आहे की, पाकिस्तानमधील खैबर पख्तूनख्वा आणि बलुचिस्तानसारखे भाग अतिरेकी कारवायांचे केंद्र बनले आहेत, जिथे सुरक्षा दल आणि नागरिक दोघांनाही सतत लक्ष्य केले जात आहे.
Comment List