मेसेज वाचणं होणार एकदम सोपं,व्हॉट्सअ‍ॅपनं आणलं नवीन एआय फीचर

व्हॉट्सअॅपने एआय फीचर लाँच केले आहे. फीचरचे नाव ‘एआय समराईज’ असे आहे. नव्या फीचरमुळे आता युजर्संना अनेक मेसेज एका छोटय़ा सारांशाच्या माध्यमातून पटकन समजून वाचता येणार आहेत. यामुळे व्हॉट्सअॅपवरील संवाद आणखी वेगवान आणि सुलभ होणार आहे. व्हॉट्सअॅपचे ‘मेसेज समरीज’ हे आर्टिफिशियल इंटेलिजन्सवर चालणारं फीचर आहे. याच्या मदतीने, युजर्संना त्यांच्या चॅटमधील न वाचलेले अनेक मेसेज एकाच वेळी एका छोटय़ा सारांशात वाचता येतात. म्हणजेच प्रत्येक मेसेज वेगळा वाचण्याची गरज नाही. एआय तुमच्यासाठी मुख्य मुद्दे आणि माहिती एका क्लिकमध्ये समोर दाखवणार आहे. हे विशेषतः त्या वेळी उपयुक्त ठरतं, जेव्हा तुम्ही मीटिंग, प्रवास किंवा कामामुळे अनेक मेसेज मिस करता आणि नंतर एकदम खूप मेसेज येतात.

फीचर कसे वापरायचे…

हे फीचर बाय डिफॉल्ट ऑक्टिव्हेट केलेले नाही. युजर्सला आपल्या गरजेनुसार व्हॉट्सअॅपचे हे नवीन फीचर ऑन किंवा ऑफ करता येईल. अॅडव्हान्स चॅट प्रायव्हसी सेटिंगद्वारे कोणत्या चॅटसाठी एआय सारांश मिळवायचा हेही ठरवता येतं. त्यामुळे संवेदनशील किंवा खासगी चॅट्स एआय सारांशातून वगळता येतात.

 सध्या अमेरिकेतील युजर्संसाठी ‘मेसेज समरीज’ फीचर सुरू करण्यात आलंय. लवकरच हे फीचर इतर देश आणि भाषांमध्येदेखील उपलब्ध होणार आहे, असे मेटाने सांगितले.