संदीपान भुमरेंच्या ड्रायव्हरला 150 कोटी रुपयांची तीन एकर जमीन भेट! आर्थिक गुन्हे शाखेकडून चौकशी सुरू

मिंधे गटाचे खासदार संदीपान भुमरे यांच्या ड्रायव्हरला हैदराबादच्या प्रतिष्ठित सालार जंग कुटुंबाकडून 150 कोटी रुपये किंमतीची तीन एकर जमीन भेट म्हणून देण्यात आल्याने खळबळ उडाली आहे. ही जमीन छत्रपती संभाजीनगरमधील जालना रोडवरील दाऊदपुरा येथे आहे. आता याच प्रकरणी संदीपान भुमरे, आमदार विलास भुमरे आणि त्यांचा चालक जावेद रसूल यांची आर्थिक गुन्हे शाखेकडून चौकशी सुरू आहे.

माल्ल्या माहितीनुसार, जावेद रसूल शेख हा गेल्या 13 वर्षांपासून खासदार संदीपान भुमरे आणि त्यांचे आमदार पुत्र विलास भुमरे यांच्याकडे ड्रायव्हर म्हणून काम करतो. सालार जंग कुटुंबातील मीर मझहर अली खान आणि त्यांच्या सहा नातेवाईकांनी हिबानामा (भेटपत्र) तयार करून ही जमीन जावेदच्या नावे केली. मात्र या व्यवहारावर परभणी येथील वकील मुजाहिद खान यांनी प्रश्नचिन्ह उपस्थित केले आहे. त्यांनी पोलिसांकडे तक्रार दाखल केली, ज्यामुळे आर्थिक गुन्हे शाखेकडून याची चौकशी सुरू केली.

काय आहे संशय?

याबाबत बोलताना वकील मुजाहिद खान म्हणाले आहेत की, ही जमीन ड्रायव्हर जावेद रसूल शेख याला बक्षीसपत्राद्वारे मिळवली. जी जवळपास 12 एकर जमीन संभाजीनगर शहराच्या मध्यवर्ती ठिकाणी असून याची किंमत 150 कोटी रुपये इतकी आहे. ही जमीन संदिपान भूमरे आणि त्यांच्या मुलाने ड्रायव्हर जावेद रसूल शेख याच्या नावावर खरेदी केल्याचा आरोप मुजाहीत खान यांनी केला आहे. त्यांनी पुढे म्हटलं आहे की, रक्ताच्या नात्यातील व्यक्तीने हिबानामा केल्यास तो कायदेशीररित्या वैध ठरतो. मात्र सालारजंगचे वंशज आणि भुमरे यांचा चालक यांचा काहीही संबंध नाही. म्हणूनच या प्रकरणी संशय बळावला असून गुन्हे शाखेकडून याची चौकशी सुरु आहे.