अंतराळ स्थानकात हिंदुस्थानचे पहिले पाऊल, शुभांशु यांना घेऊन झेपावलेले रॉकेट उतरले!

नासाच्या ऑक्सिऑम-4 मोहिमे अंतर्गत चार अंतराळवीरांना घेऊन बुधवारी अवकाशात झेपावलेले फाल्कन – 9 हे रॉकेट आज आंतरराष्ट्रीय अंतराळ स्थानकात उतरले. गुरुवारी सायंकाळी 4.16 मिनिटांनी यानाच्या डॉकिंगची प्रक्रिया पूर्ण झाली. त्याचबरोबर आंतरराष्ट्रीय अंतराळ स्थानकात भारताचे पहिले पाऊल पडले. या मोहिमेत सहभागी असलेले हिंदुस्थानी हवाई दलाचे ग्रुप कॅप्टन शुभांशु शुक्ला यांच्या रूपाने भारताला हा मान मिळाला आहे.

अमेरिकेच्या जॉन एफ केनेडी स्पेस सेंटरवरून काल दुपारी 12 वाजून 1 मिनिटाने फाल्कन-9 या रॉकेटने अंतराळ स्थानकाच्या दिशेने उड्डाण भरले होते. उड्डाणानंतर काही तासांतच पृथ्वीच्या वातावरणातून बाहेर पडून रॉकेटने अंतराळात प्रवेश केला. तब्बल 28 तासांच्या प्रवासानंतर आज रॉकेटने अंतराळ स्थानकात नांगर टाकला.

अंतराळ स्थानकात लँड होण्यासाठी आवश्यक असलेला वेग आणि वेळेचे गुंतागुंतीचे गणित सोडवल्यानंतर रॉकेट स्थिरावण्याची प्रक्रिया सुरू झाली. भारतीय प्रमाणवेळेनुसार, दुपारी 4.01 मिनिटांनी मिशन पंट्रोलने ‘सॉफ्ट पॅप्चर’चा सिग्नल दिला. म्हणजे सुरुवातीचा संपर्क स्थापित झाला. त्यानंतर काही मिनिटांनंतर ‘हार्ड पॅप्चर’ म्हणजेच यान आणि अंतराळ स्थानकात मजबूत संपर्क स्थापित झाला आणि 4.15 मिनिटांनी डॉकिंग प्रक्रिया पूर्ण झाली.

‘आंतरराष्ट्रीय अंतराळ स्थानकात पोहोचणं हा आमच्यासाठी सन्मान आहे. धन्यवाद! असे ऑक्सिऑम-4 च्या मोहिमेचे नेतृत्व करणारे अंतराळवीर पेगी व्हिटसन यांनी सांगितले.

शुभांशु शुक्ला आणि त्यांचे सहकारी पुढील 15 दिवस अंतराळ स्थानकात राहून 60 प्रयोग करणार आहेत. त्यापैकी 7 प्रयोग हिंदुस्थानने सुचवले आहेत.

लहान बाळासारखा शिकतोय, एन्जॉय करतोय!

‘हे एक वेगळे आणि नवीन वातावरण आहे. एक नवीन आव्हान आहे. मी माझ्या सहकारी अंतराळवीरांसोबत हा अनुभव खरोखर एन्जॉय करतोय. चुका करणं चांगलं असतं, पण दुसऱयाकडून झालेल्या चुका पाहायला आणखी मजा येते. आमच्यासाठी हा एक मजेशीर अनुभव आहे. अंतराळात पोहोचल्यानंतर सुरुवातीला काही विशेष वाटलं नाही, मात्र नंतर आश्चर्यकारक अनुभव आला. रॉकेट लाँच झाल्यानंतर बराच वेळ मी झोपलो होतो, असं माझ्या सहकाऱयांनी सांगितलं. मला आता या वातावरणाची सवय होतेय. मी बाहेरच्या दृश्यांचा आनंद घेतोय. एखाद्या लहान बाळासारखा शिकतोय. नव्यानं पावलं टाकायला, चालायला शिकतोय. तोल सावरायला शिकतोय. खायला शिकतोय. हे सगळं खूपच रोमांचक आहे, असे शुभांशु म्हणाले.