ही ब्रिटिशांची देशी आवृत्ती! शेतकऱ्यांबद्दल वादग्रस्त विधान करणाऱ्या बबनराव लोणीकरांवर अंबादास दानवेंचा निशाणा

‘मोदींनी पेरणीसाठी दिले 6000 रुपये, तुझ्या अंगावरचे कपडे अन् पायातील चप्पल सरकारमुळेच’, अशी उद्दाम भाषा वापरणारे भाजप आमदार बबनराव लोणीकर यांच्यावर विधान परिषदेचे विरोधी पक्षनेते अंबादास दानवे यांनी घणाघात चढवला आहे. ही ब्रिटिशांची देशी आवृत्ती, लोकशाहीत ही भाषा बरी नव्हे बबनराव, अशा शब्दात दानवे यांनी लोणीकर यांच्यावर निशाणा साधला.

जालना जिल्ह्यातील परतूर येथे एका कार्यक्रमात बोलताना बबनराव लोणीकर यांनी शेतकऱ्यांबद्दल वादग्रस्त वक्तव्य केले होते. “कुचरवट्यावर बसलेली काही रिकामटेकडी कार्टी सोशल मीडियावर मोदी आणि देवेंद्र फडणवीस यांचे अंधभक्त असल्याचे लिहितात. याच कूचवट्यावर बसून सोशल मीडियावर चर्चा करणाऱ्या कार्ट्यांच्या माईचा पगार आणि बापाची पेन्शन बबनराव लोणकर यांनीच केला आहे. तर नरेंद्र मोदींनी तुझ्या बापाला सहा हजार रुपये पेरणीला दिले आहेत, तुझ्या अंगावरचे कपडे, पायातील बुट-चप्पल सुद्धा सरकारमुळेच आहे,” असे विधान लोणीकर यांनी केले होते. यामुळे शेतकरी वर्गात संतापाची लाट उसळली होती. यावर आता अंबादास दानवे यांनीही खरमरीत प्रतिक्रिया दिली आहे.

अंबादास दानवे यांनी बबनराव लोणीकर यांचा व्हिडीओ आपल्या एक्स (आधीचे ट्विटर) अकाऊंटवर पोस्ट केला आहे. “ही ब्रिटिशांची देशी आवृत्ती! लोकशाहीत ही भाषा बरी नव्हे बबनराव. कारण, तुमचे कपडे, बूट या जनतेमुळे…आमदारकी जनतेमुळे…तुमच्या गाडीतील डिझेल जनतेमुळे…तुमचे विमानाचे तिकीट जनतेमुळे…नेतेगिरी जनतेमुळे…विधानसभेतील स्थान जनतेमुळे…”, असा हल्लाबोल दानवे यांनी केला. तसेच यांचे हे बोल लक्षात ठेवा. निवडणूक येते आहे, असे म्हणत त्यांनी शेतकऱ्यांचा अपमान करणाऱ्या भाजपला जनतेने निवडणुकीत धडा शिकवावा असे आवाहन केले.

ही ब्रिटिशांची देशी आवृत्ती! लोकशाहीत ही भाषा बरी नव्हे बबनराव. कारण..

तुमचे कपडे,बूट या जनतेमुळे..
आमदारकी जनतेमुळे..
तुमच्या गाडीतील डिझेल जनतेमुळे..
तुमचे विमानाचे तिकीट जनतेमुळे..
नेतेगिरी जनतेमुळे..
विधानसभेतील स्थान जनतेमुळे..

यांचे हे बोल लक्षात ठेवा. निवडणूक येते आहे! pic.twitter.com/RcSleViNGL

— Ambadas Danve (@iambadasdanve) June 26, 2025