नववीतील विद्यार्थ्याच्या खुनाने अहिल्यानगर हादरले! सीताराम सारडा शाळेतील घटना;हल्लेखोर आठवीतील मुलगा ताब्यात

अहिल्यानगर शहरातील सीताराम सारडा या शाळेत नववीमध्ये शिकत असलेल्या मुलाचा खून करण्यात आल्याच्या घटनेने खळबळ उडाली आहे. या प्रकरणी तोफखाना पोलिसांनी घटनास्थळी धाव घेत तपास सुरू केला आहे. रात्री उशिराने यासंदर्भातला गुन्हा दाखल होणार आहे. दरम्यान, पोलिसांनी संबंधित अल्पवयीन मुलाला ताब्यात घेतले आहे. अफान तन्वीर शेख असे खून झालेल्या मुलाचे नाव आहे.

या शाळेत आठवीमध्ये शिकणाऱ्या मुलाने नववीतील अफानसोबत मागील कारणावरून हुज्जत घालण्याचा प्रयत्न केला. या दोघांमध्ये शाब्दिक चकमक उडाली. आठवीमध्ये शिकणाऱ्या अल्पवयीन मुलाने त्याच्याकडे असलेल्या चाकूने नववीतील अफानवर वार केले. यात गंभीर जखमी अफानला उपचारासाठी जिल्हा रुग्णालयामध्ये दाखल केले असता त्याचा मृत्यू झाल्याचे डॉक्टरांनी सांगितले.

बागडपट्टी येथील सीताराम सारडा महाविद्यालय हे हिंदसेवा मंडळाचे आहे. मध्यंतरीच्या काळामध्ये या शाळेत प्राध्यापक हेरंब कुलकर्णी हे प्राचार्य म्हणून कार्यरत होते. त्यांनी जेव्हा पदभार घेतला तेव्हा त्यांनी आजूबाजूच्या अवैध धंद्यांना आळा घालण्याची मागणी केली होती.