Axiom -4 Mission हे हिंदुस्थानच्या स्पेस संशोधनाला नवी दिशा देणारे ठरेल, आदित्य ठाकरे यांनी व्यक्त केला विश्वास

हिंदुस्थानचा ग्रुप कॅप्टन शुभांशू शुक्लासह चार अंतराळवीरांना घेऊन अ‍ॅक्सिओम-4 मिशन आज दुपारी 12.01 वाजता (IST) नासाच्या केनेडी स्पेस सेंटरवरून प्रक्षेपित करण्यात आले. फॉल्कन-9 या रॉकेटद्वारे त्यांनी अवकाशात उड्डाण केलं आहे. हे मिशन चार अंतराळवीरांना आंतरराष्ट्रीय अंतराळ स्थानकाकडे (ISS) घेऊन जात आहे. या मिशनच्या यशस्वी उड्डाणानंतर देशभरातून कौतुकाचा वर्षाव होत आहे. शिवसेना (उद्धव बाळासाहेब ठाकरे) पक्षाचे नेते, युवासेनाप्रमुख, आमदार आदित्य ठाकरे यांनी देखील या मोहिमेचे कौतुक केले आहे.

आदित्य ठाकरे यांनी ट्विट करत ही मोहिम भारताच्या स्पेस संशोधनाला नवी दिशा देणारी ठरेल असे म्हटले आहे. ”भारतीय हवाई दलाचे ग्रुप कॅप्टन शुभांशू शुक्ला यांनी आज Axiom-4 मिशन अंतर्गत SpaceX च्या Falcon-9 रॉकेटच्या सहाय्याने आंतरराष्ट्रीय अंतराळ स्थानकाच्या दिशेने (ISS) उड्डाण केले आहे. ही आम्हा भारतीयांसाठी अत्यंत अभिमानास्पद गोष्ट आहे. तब्बल 41 वर्षांनंतर अंतराळाच्या दिशेने झेपावणारे शुभांशू शुक्ला हे दुसरे भारतीय आहेत. 14 दिवसांची ही मोहीम भारताच्या स्पेस संशोधनाला नक्कीच नवी दिशा देणारी ठरेल”, असे आदित्य ठाकरे यांनी ट्विट केले आहे.