इस्रायल आणि इराण दोघांनीही शस्त्रसंधीचं केलं उल्लंघन, डोनाल्ड ट्रम्प संतापले

मध्य पूर्वेत इराण आणि इस्रायल यांच्यातील तणावपूर्ण संघर्षाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी एक महत्त्वपूर्ण वक्तव्य केलं आहे. ट्रम्प यांनी जाहीर केलेल्या शस्त्रसंधीचं उल्लंघन दोन्ही देशांनी केलं आहे. विशेषतः इस्रायलवर संताप व्यक्त करताना ट्रम्प म्हणाले की, “इस्रायलने युद्धविराम करार स्वीकारल्यानंतर लगेचच हल्ले केले, जे मला अजिबात आवडलं नाही.” रॉयटर्सने याबाबत वृत्त दिलं आहे.

डोनाल्ड ट्रम्प यांनी मंगळवारी आपल्या सोशल मीडिया प्लॅटफॉर्म ट्रुथ सोशलवर इराण आणि इस्रायल यांच्यात पूर्ण आणि संपूर्ण शस्त्रसंधी लागू झाल्याची घोषणा केली होती. हा करार 24 तासांत टप्प्याटप्प्याने लागू होणार होता, ज्यामुळे मध्य पूर्वेत शांतता प्रस्थापित होईल, असा दावा त्यांनी केला होता. शस्त्रसंधीनुसार, इराणने प्रथम हल्ले थांबवायचे होते, त्यानंतर 12 तासांनी इस्रायलनेही हल्ले थांबवायचे होते. 24 तासांनंतर युद्ध औपचारिकपणे थांबल्याचं मानलं जाणार होतं.

मात्र या घोषणेनंतर काही तासांतच दोन्ही देशांनी एकमेकांवर हल्ले केल्याचे आरोप केले. इस्रायलच्या संरक्षण मंत्र्यांनी इराणवर शस्त्रसंधीचं उल्लंघन केल्याचा आरोप करत तेहरानवर जोरदार प्रत्युत्तर देण्याचे आदेश दिले. दुसरीकडे, इराणनेही इस्रायलवर शस्त्रसंधीनंतर हल्ले केल्याचा दावा केला.