इस्रायलने इराणला युद्ध थांबवण्यासाठी एक औपचारिक संदेश पाठवला आहे, असं वृत्त इस्रायलमधील स्थानिक माध्यमाने दिले आहे. इराणने या संदेशाला प्रतिसाद देताना म्हटले आहे की, युद्ध थांबवण्याची वेळ अजून आलेली नाही. ‘द टाईम्स ऑफ इस्रायल’ या इस्रायली वृत्तपत्राने अमेरिकन वृत्तपत्र ‘वॉल स्ट्रीट जर्नल’च्या हवाल्याने हे वृत्त दिलं आहे. या वृत्तांमध्ये काही इस्रायली आणि अरब सूत्रांचा हवालाही देण्यात आला आहे. एका इस्रायली अधिकाऱ्याने द टाईम्स ऑफ इस्रायलला सांगितले की, “जर इराणने आपला अणुकार्यक्रम संपवण्यास सहमती दर्शवली तर इस्रायल बॉम्ब हल्ले थांबवण्यास तयार आहे.”
दरम्यान, इस्रायल आणि इराण यांच्यात गेल्या काही दिवसांपासून संघर्ष सुरू आहे. इस्रायलने इराणच्या लष्करी आणि अण्वस्त्र सुविधांवर हवाई हल्ले केले, तर इराणनेही इस्रायलवर मिसाइल आणि ड्रोन हल्ल्यांचा प्रतिकार केला. या युद्धात दोन्ही देशांमध्ये मोठ्या प्रमाणात जीवितहानी आणि नुकसान झाले आहे. इस्रायलच्या हल्ल्यांमुळे इराणमध्ये सुमारे 430 जणांचा मृत्यू झाला, तर 3,500 हून अधिक जण जखमी झाले आहेत, असे इराणी माध्यमांनी म्हटले आहे.
अमेरिकेनेही या संघर्षात उडी घेतली असून राष्ट्राध्यक्ष डोनाल्ड ट्रम्प यांनी तीन इराणी अणुस्थळांवर हल्ले केल्याचे जाहीर केले होते. यामुळे युद्ध आणखी चिघळण्याची भीती व्यक्त केली जात आहे. ट्रम्प यांनी इराणला शांततेच्या चर्चेसाठी पुढे येण्याचे आवाहन केले आहे. परंतु इराणने युद्धादरम्यान अण्वस्त्र कार्यक्रमावर कोणतीही चर्चा न करण्याची भूमिका घेतली आहे.
Comment List