पृथ्वी शॉचा मार्ग मोकळा! MCA ने NOC मंजूर केली, आता दुसऱ्या राज्याकडून मैदानात उतरणार

स्टार खेळाडू पृथ्वी शॉने दुसऱ्या राज्याकडून व्यावसायिक क्रिकेट खेळण्याची ऑफर असल्याचे सांगत मुंबई क्रिकेट असोसिएशनकडे ना हरकत (NOC) प्रमाणपत्राची मागणी केली होती. तसे पत्र त्याने मुंबई क्रिकेट असोसिएशनला लिहिले होते. योग्य विचार केल्यानंतर MCA ने पृथ्वी शॉला NOC मंजूर केली आहे.

रणजी करंडक आणि त्यानंतर विजय हजारे करंडकातही पृथ्वी शॉला खराब कामगिरी आणि फिटनेसमुळे मुंबईच्या संघातून वगळण्यात आलं होतं. त्याला फिटनेस सुधारण्याचा आणि वजन कमी करण्याचा सल्ला MCA ने दिला होता. परंतु त्याच्या फिटनेसमध्ये सुधारणा झाली नाही. अशातच त्याने दुसऱ्या राज्याकडून खेळण्यासाठी ना हरकत प्रमाणपत्र देण्याची मागणी MCA कडे पत्राद्वारे केली होती. MCA ने पृथ्वी शॉच्या मागणीचा विचार करून त्याला ना हरकत प्रमाणपत्र दिले आहे. MCA ने यासंदर्भात माहिती दिली, “मुंबई क्रिकेट असोसिएशन (MCA) हे कळवू इच्छिते की क्रिकेटपटू पृथ्वी शॉने आगामी देशांतर्गत हंगामात व्यावसायिक खेळाडू म्हणून दुसऱ्या राज्याकडून खेळण्यासाठी औपचारिकपने ना हरकत प्रमाणपत्राची मागणी केली होती. योग्य विचार केल्यानंतर, MCA ने NOC मंजूर केली आहे.” अशी माहिती मुंबई क्रिकेट असोसिएशनने दिली. त्याचबरोबर पृथ्वी शॉने मुंबई क्रिकेटमध्ये महत्त्वपूर्ण योगदान दिले असून आम्ही त्याच्या निर्णयाचा आदर करत असल्याच सुद्धा MCA ने म्हटलं आहे. तसेच त्याला शुभेच्छा दिल्या आहेत.