पतीला संपवण्यासाठी विष आणलं, मग असं काय घडलं की पत्नीनेच ते प्राशन करत जीवन संपवलं?

अनैतिक संबंध, संपत्तीचा हव्यास या कारणातून पतीची हत्या करण्याच्या घटना दिवसेंदिवस वाढत आहेत. अशी एक घटना कानपूरमध्ये उघडकीस आली आहे. अनैतिक संबंधात अडथळा ठरणाऱ्या पतीचा काटा काढण्यासाठी पत्नी विष घेऊन आली. मात्र पतीला देण्याऐवजी स्वतःच विष प्राशन करत तिने जीवन संपवले. याप्रकरणी नवाबगंज पोलीस पुढील तपास करत आहेत.

काय घडलं नेमकं?

पती-पत्नीचं दोघांचंही हे दुसरं लग्न होतं. एक वर्षाभर पती एका गुन्ह्यात तुरुंगवास भोगत होता. या काळात पत्नीचे पुतण्यासोबत सूत जुळले. दोन महिन्यांपूर्वी पती तुरुंगातून सुटून बाहेर आला. पतीला पत्नीच्या हालचाली संशयास्पद वाटत होत्या. त्यामुळे पत्नीवर लक्ष ठेवून होता. यादरम्यान त्याला पत्नीचे पुतण्यासोबत अनैतिक संबंध असल्याचे समजले. एके दिवशी त्याने दोघांना रंगेहाथ पकडले.

पती अनैतिक संबंधाला विरोध करत असल्याने पत्नी आणि पुतण्याने त्याला मारण्याचा कट रचला. पतीला जीवे मारण्यासाठी पत्नी विष घेऊन आली. त्याच दिवशी पतीने पत्नीचा मोबाईल तपासला तेव्हा पुतण्यासोबत तिचे आक्षेपार्ह फोटो दिसले. यानंतर पती-पत्नीमध्ये जोरदार भांडण झाले. या भांडणातून पतीसाठी आणलेले विष पत्नीने स्वतः प्राशन केले. तिला तात्काळ रुग्णालयात नेण्यात आले. मात्र उपचारादरम्यान तिचा मृत्यू झाला. पोलीस प्रकरणाचा सखोल तपास करत आहेत.