दहशतवाद्यांना आश्रय देणाऱ्या दोघांना श्रीनगरमधून अटक, पहलगाम हल्ला

जम्मू-कश्मीरच्या पहलगाममध्ये अतिशय क्रूरपणे हल्ला करून 26 पर्यटकांचा बळी घेणाऱया दहशतवाद्यांना आश्रय देणाऱया दोघांना एनआयए अर्थात राष्ट्रीय तपास यंत्रणेने अटक केली आहे. दहशतवाद्यांना आश्रय देण्यासह त्यांना विविध प्रकारची रसद पुरवल्याच्या आरोपाखाली दोघांना ताब्यात घेण्यात आले आहे.

बटकोट येथील परवेज अहमद जोथार आणि हिल पार्क येथील बशीर अहमद जोथार अशी या दोघांची नावे असून या दोघांनी हल्ल्यात सहभागी असलेल्या तीन सशस्त्र दहशतवाद्यांची ओळख उघड केली आहे. तीन दहशतवादी लष्कर-ए-तोयबाशी संबंधित असून पाकिस्तानी नागरिक असल्याची माहितीही दोघांनी एनआयएच्या तपासादरम्यान दिली आहे. परवेझ आणि बशीर यांनी तीन सशस्त्र दहशतवाद्यांना हिल पार्क येथील झोपडीत जाणूनबुजून आश्रय दिल्याचे एनआयएच्या अधिकाऱयांनी सांगितले. या दहशतवाद्यांना दोघांनी अन्न, निवारा आणि आवश्यक सर्व जीवनावश्यक वस्तू पुरवल्याचे तपासात समोर आल्याचे अधिकाऱयांनी स्पष्ट केले.

3 हल्लेखोर पाकिस्तानी

अनंतनाग पोलिसांनी तीन दहशतवाद्यांचे स्केच जारी केले होते. अनंतनागचा आदिल हुसेन ठोकर, हाशिम मुसा ऊर्फ सुलेमान व अली अर्फ तल्हा, मुसा आणि अली पाकिस्तानी असून मुसा पाकिस्तानच्या स्पेशल सर्व्हिस ग्रुपमध्ये कमांडो म्हणून कार्यरत होता. यातील कोणत्या तीन दहशतवाद्यांना आरोपींनी आश्रय दिला होता हे स्पष्ट झालेले नाही.