अमेरिकेच्या हल्ल्यानंतर दिल्लीत मोठ्या घडामोडी; पंतप्रधान मोदींचा इराणच्या राष्ट्रपतींना फोन, म्हणाले…

इराण-इस्रायल युद्धामध्ये रविवारी अमेरिकेने उडी घेतली. अमेरिकेच्या ‘बी-2 स्टील्थ बॉम्बर’ विमानांनी इराणच्या तीन आण्विक तळांवर हवाई हल्ले केले. यानंतर इराणनेही अमेरिकेला धमकी दिली. तसेच इस्रायलवरही क्षेपणास्त्र डागले. याच पार्श्वभूमीवर हिंदुस्थानमध्येही मोठ्या घडामोडी घडत आहेत. इराण-इस्रायल युद्धावर हिंदुस्थान बारीक लक्ष ठेऊन आहे. आता अमेरिकेच्या थेट सहभागानंतर पंतप्रधान नरेंद्र मोदी सक्रिय झाले असून त्यांनी इराणचे राष्ट्रपती मसूद पेजेशकियान यांच्याशी फोनवरून संवाद साधला.

पंतप्रधान नरेंद्र मोदी यांनी रविवारी दुपारी तीनच्या सुमारास आपल्या एक्स (आधीचे ट्विटर) अकाऊंटवरून इराणच्या राष्ट्रपतींशी फोनवरून संवाद साधल्याची माहिती दिली. मी इराणचे राष्ट्रपती मसूद पेजेशकियान यांच्याशी संवाद साधला. आम्ही सध्याच्या परिस्थितीवर सविस्तर चर्चा केली, असे मोदींनी सांगितले.

मोदींनी लष्करी संघर्षाबाबत तीव्र चिंता व्यक्त केली. दोन देशामधील तणाव तात्काळ कमी करण्यासाठी संवाद आणि राजनैतिकतेचा मार्ग स्वीकारण्याचे आवाहनही मोदींनी केले. तसेच आखाती देशात शांतता, सुरक्षा आणि स्थिरतेवर भर द्यावा, असे आवाहन मोदींनी केले.

Spoke with President of Iran @drpezeshkian. We discussed in detail about the current situation. Expressed deep concern at the recent escalations. Reiterated our call for immediate de-escalation, dialogue and diplomacy as the way forward and for early restoration of regional…

— Narendra Modi (@narendramodi) June 22, 2025