पहलगाम हल्ल्यातील दहशतवाद्यांना मदत केल्याप्रकरणी दोघांना अटक, NIA ला मोठे यश

पहलगाम येथे झालेल्या दहशतवादी हल्ल्याप्रकरणी राष्ट्रीय तपास संस्थे (NIA) ला मोठे यश मिळाले आहे. या जीवघेण्या हल्ल्यात सामील असलेल्या पाकिस्तानी दहशतवाद्यांना लपवून ठेवल्याच्या आरोपावरून दोघांना अटक करण्यात आली आहे. अटक करण्यात आलेल्या व्यक्तींमध्ये पहलगाममधील बटकोट गावातील परवेज अहमद जोथर आणि हिल पार्क येथील बशीर अहमद जोथर यांचा समावेश आहे.

तपास संस्थेनुसार, चौकशी दरम्यान या दोघांनी तीन दहशतवाद्यांबाबत सांगितले आणि ते लश्कर-ए-तैयबा (एलईटी) या दहशतवादी संघटनेशी संबंधित पाकिस्तानी नागरिक असल्याचे उघड झाले. एनआयएच्या तपासानुसार, परवेज आणि बशीर यांनी हल्ल्याच्या आधी हिल पार्क येथील एका झोपडीत या दहशतवाद्यांना जाणीवपूर्वक आसरा दिला होता.

या ठिकाणी राहिल्यानंतर दहशतवाद्यांनी पर्यटकांच्या जागेची रेकी केली आणि त्यानंतर हल्ला केला. त्यांनी लोकांचे धर्म विचारून त्यांच्यावर गोळ्या झाडल्या. या हल्ल्यात 26 पर्यटकांचा मृत्यू झाला, तर अनेक जण जखमी झाले. एनआयएने सांगितले की या दोघांवर UAPA अंतर्गत गुन्हा दाखल करण्यात आला आहे आणि त्यांना अटक करण्यात आली असून सध्या तपास सुरू आहे.

22 एप्रिल रोजी हातात शस्त्रे असलेल्या दहशतवाद्यांनी पहलगामच्या बैसरन खोऱ्यात हल्ला केला होता. या वेळी त्यांनी धर्म विचारून त्यांच्यावर गोळीबार केला होता. या हल्ल्यानंतर भारताने पाकिस्तान आणि पाकव्याप्त कश्मीर मधील दहशतवादी तळांवर हवाई हल्ले केले होते. त्यामुळे भारत-पाकिस्तान सीमेवर तणाव निर्माण झाला होता.