इराणचे सर्वोच्च नेता अयातुल्ला अली खोमेनी यांनी इस्रायलसोबत सुरू असलेल्या संघर्षादरम्यान आणि इस्रायलकडून हत्येच्या धमक्यांच्या पार्श्वभूमीवर आपले संभाव्य उत्तराधिकारी म्हणून तीन वरिष्ठ मौलवींची नावे जाहीर केली आहेत. विशेष म्हणजे यामध्ये त्यांचा मुलगा मोजतबा खोमेनी यांचा समावेश नाही. ज्यांना यापूर्वी उत्तराधिकारी म्हणून तयार केले जात असल्याची चर्चा होती. न्यूयॉर्क टाइम्सच्या अहवालानुसार, खोमेनी यांनी ही नावे इस्रायलच्या हल्ल्यांमुळे निर्माण झालेल्या असुरक्षिततेमुळे आणि युद्धकाळातील आपत्कालीन योजनेच्या अंतर्गत जाहीर केली आहेत.
इराण आणि इस्रायलमधील तणाव वाढत असताना अयातुल्ला अली खोमेनी यांना तेहरानच्या ईशान्य भागातील लव्हिझान येथील एका सुरक्षित भूमिगत बंकरमध्ये हलवण्यात आले आहे. त्यांच्यासोबत त्यांचे कुटुंब, त्यात त्यांचा मुलगा मोजतबा यांचाही समावेश आहे. खोमेनी यांनी इलेक्ट्रॉनिक संवाद बंद करून विश्वासू सहकाऱ्यामार्फत संदेश पाठवण्यास सुरुवात केली आहे, जेणेकरून त्यांचे स्थान शोधणे कठीण होईल.
अयातुल्ला अली खोमेनी यांनी इस्रायलच्या हल्ल्यांमुळे मारल्या गेलेल्या लष्करी कमांडरच्या जागी नवीन नेमणुका केल्या आहेत. याशिवाय त्यांनी इराणच्या सर्वोच्च नेत्याची निवड करणाऱ्या विशेषज्ञ सभेला (Assembly of Experts) आपल्या मृत्यूच्या परिस्थितीत तातडीने उत्तराधिकारी निवडण्याचे निर्देश दिले आहेत. सामान्यत: ही प्रक्रिया अनेक महिने चालते, परंतु युद्धकाळात त्वरित आणि नियंत्रित सत्तांतर व्हावे, तसेच इस्लामिक रिपब्लिक आणि त्यांचा स्वत:चा वारसा सुरक्षित राहावा, यासाठी खोमेनी यांनी तीन नावे सुचवली आहेत. या नावांमध्ये मोजतबा यांचा समावेश नसल्याने आश्चर्य व्यक्त केले जात आहे.
Comment List