हवेत विमानाचं डोअर धडाधड आदळत होतं, आवाजाने प्रवाशांचा जीव मुठीत! Air India च्या फ्लाइटमधील भीतीदायक अनुभव

दिल्ली ते हाँगकाँगला जाणाऱ्या एअर इंडियाच्या AI-314 या बोईंग 787 विमानात 1 जून 2025 रोजी हवेत एक धक्कादायक प्रकार घडला. बोईंग 787 विमानात हवेत असताना दरवाजे धडाधड आदळल्याची घटना घडली. दरवाजा धडाधड आदळत असल्याने होणाऱ्या आवाजामुळे प्रवाशांमध्ये भीती पसरली होती. उड्डाणाला सुमारे एक तास झाल्यावर दरवाज्यामधून हा आवाज येऊ लागला.

मिळालेल्या माहितीनुसार, दरवाज्याच्या सीलमधील हवेच्या दाबामुळे हा आवाज निर्माण झाला होता. यामुळे घाबरलेल्या प्रवाशांना शांत करण्यासाठी विमानातील कर्मचाऱ्यांनी दरवाज्याच्या वरच्या बाजूला असलेल्या छोट्या फटीत कागदी नॅपकिन्स भरून आवाज कमी करण्याचा प्रयत्न केला.

दरम्यान, अशा प्रकारची ही पहिलीच घटना नाही. याआधी 2019 मध्ये जपान एअरलाइन्स, 2022 मध्ये TUI एअरलाइन्स आणि अमेरिकन एअरलाइन्सच्या विमानांमध्येही असेच प्रकार घडले होते. तज्ज्ञांच्या मते, हवेच्या दाबामुळे अशा फटींमधून हवा बाहेर पडताना असा आवाज येतो, परंतु यामुळे विमानाच्या सुरक्षिततेला धोका निर्माण होत नाही. कारण दरवाजे हवेत उघडणे अशक्य आहे.

एअर इंडियाने सांगितले की, विमान हाँगकाँगला सुरक्षितपणे उतरले आणि तपासणीनंतर सर्व सुरक्षा मानके पूर्ण असल्याचे आढळले. परतीच्या फ्लाइट AI-315 मध्ये असा कोणताही आवाज आढळला नाही.