इराणचे सर्वोच्च नेते अयातुल्ला अली खामेनेई यांनी अमेरिकेचे अध्यक्ष डोनाल्ड ट्रम्प यांना जोरदार प्रत्युत्तर दिले आहे. ट्रम्प यांनी खामेनेई यांना कोणत्याही अटीशिवाय सरेंडर करण्यास सांगितले होते. ट्रम्प यांना उत्तर देताना खामेनेई यांनी स्पष्ट सांगितले की, ते कधीही समर्पण करणार नाहीत आणि जर अमेरिकेचे सैन्य या संघर्षात हस्तक्षेप करेल, तर त्यांना त्याचे गंभीर परिणाम भोगावे लागतील, असा इशाराही खामेनेई यांनी दिला.
न्यू यॉर्क टाइम्सच्या वृत्तानुसार, खामेनेई यांनी त्यांच्या भाषणात म्हटले की ” ज्यांना इराणचा इतिहास माहितीये ते कधीही धमकीच्या सुरात बोलणार नाहीत, कारण इराणी जनता कधीही समर्पण करत नाही.” त्यांनी हेही सांगितले की, जर अमेरिकन लष्कराने काही हस्तक्षेप केला, तर याची मोठी किंमत चुकवावी लागेल असेही खामेनेई म्हणाले.
खामेनेई यांचे हे विधान ट्रम्पच्या त्या वक्तव्याच्या पार्श्वभूमीवर आले आहे, ज्यामध्ये ट्रम्प यांनी खामेनेई यांची हत्या होऊ शकते, पण आत्ताच तसे करणार नाही, असे म्हटले होते. इस्रायलच्या “ऑपरेशन रायझिंग लायन”मध्ये सुरुवातीला अमेरिका अलिप्त होती. पण आता अमेरिकेने उघडपणे इस्रायलला पाठिंबा जाहीर केला आहे.
दुसरीकडे इराण आणि इस्रायलच्या संघर्षात आतापर्यंत सुमारे 600 इराणी नागरिक आणि 24 इस्रायली नागरिक मृत्युमुखी पडले आहेत. यामुळे संपूर्ण भागात तणाव वाढला आहे आणि आंतरराष्ट्रीय पातळीवर चिंता निर्माण झाली आहे.
Comment List