शत्रू देशांच्या पाणबुड्यांचा काळ! INS Arnala हिंदुस्थानी नौदलाच्या ताफ्यात दाखल

जगातील सर्वात आधुनिक आणि शक्तिशाली सैन्याच्या यादीत हिंदुस्थानी नौदलाचा समावेश आहे. आता समुद्रात हिंदुस्थानी नौदलाची ताकद आणखी वाढली आहे. आज (18 जून) नौदलाने पाणबुडीविरोधी युद्धनौका ‘आयएनएस अर्नाळा’ आपल्या ताफ्यात समाविष्ट केली. विशाखापट्टणम येथील नेव्हल डॉकयार्ड येथे झालेल्या समारंभात हिंदुस्थानचे संरक्षण दलाचे प्रमुख (CDS) जनरल अनिल अनिल चौहान देखील उपस्थित होते. आयएनएस अर्नाळा शत्रू देशांच्या पाणबुड्यांसाठी काळ ठरणार आहे.

अर्नाळा किल्ल्यावरून ठेवण्यात आलं नाव

महाराष्ट्रातील वसई येथील ऐतिहासिक अर्नाळा किल्ल्यावरून आयएनएस अर्नाळा युद्धनौकेचे नाव देण्यात आले आहे. जे हिंदुस्थानच्या समृद्ध सागरी वारशाचे प्रतिबिंब आहे. आयएनएस अर्नाळा एका मजबूत किल्ल्याप्रमाणे उभा राहील आणि समुद्रातील विविध धोक्यांविरुद्ध त्याची उपस्थिती दर्शवेल. आयएनएस अर्नाळा मजबूत बांधकाम आणि प्रगत क्षमतांनी सुसज्ज आहे.

‘आयएनएस अर्नाळा ’ हे 16 ASW-SWC युद्धनौकांच्या मालिकेतील पहिले जहाज आहे. ही युद्धनौका गुप्तचर देखरेख, किनारी सुरक्षा, शोध आणि बचाव कार्य, भूपृष्ठाखालील भागात कमी तीव्रतेच्या सागरी ऑपरेशन्स करण्यास सक्षम आहेत. हिंदुस्थानी नौदलाच्या ताफ्यात अर्नाळाचा समावेश केल्याने देशाच्या नौदल क्षमतेत मोठी वाढ होणार आहे. यामुळे किनारी सुरक्षा मजबूत होईल आणि धोरणात्मकदृष्ट्या महत्त्वाच्या हिंदी महासागर क्षेत्रात एक स्वावलंबी सागरी शक्ती म्हणून हिंदुस्थानचे स्थान आणखी मजबूत होईल.