न्हावा गावात हुंदके आणि आक्रोश; उरणच्या मैथिलीला अखेरचा निरोप

अहमदाबादमधील भीषण विमान अपघातामध्ये दुर्दैवी मृत्यू झालेली एअर हॉस्टेस मैथिली पाटील हिच्यावर आज न्हावा गावातील स्मशानभूमीत अंत्यसंस्कार करण्यात आले. तिच्या निधनामुळे पाटील कुटुंबावर दुखा:चा डोंगर कोसळला आहे. सर्वांच्या लाडक्या मैथिलीला उरणवासीयांनी अखेरचा निरोप दिला तेव्हा न्हावा गावात ऐकू येत होते ते फक्त हुंदके आणि आक्रोश.

मैथिली पाटील ही ‘एअर इंडिया’मध्ये एअर हॉस्टेस म्हणून काम करीत होती. त्या काळ्याकुट्ट दुर्घटनेच्या एक दिवस आधीच तिने कुटुंबासोबत वेळ घालवला. आईबाबा व बहीण-भावासोबत गप्पाही मारल्या. दुसऱ्या दिवशी 12 जून रोजी अहमदाबाद-लंडन या फ्लाईटसाठी कामावर रवाना झाली. विमानात चढण्यापूर्वी मैथिलीने कुटुंबातील सदस्यांशी संवाददेखील साधला. मात्र काही क्षणातच होत्याचे नव्हते झाले आणि या अपघातात मैथिलीचा मृत्यू झाला. ही बातमी तिच्या कुटुंबाला समजली तेव्हा त्यावर कोणाचाच विश्वास बसला नाही. आज तिचे पार्थिव घरी येताच आई व वडिलांनी अक्षरशः हंबरडा फोडला. तिच्या आठवणीने संपूर्ण न्हावा गाव शोकाकुल झाले. तिला अखेरचा निरोप देण्यासाठी ग्रामस्थांनी गर्दी केली होती.