अखेर गायब झालेले  पालकमंत्री अवतरले…!

कुंडमळा येथील पूल कोसळण्याची दुर्घटना घडल्यानंतर गायब असलेले पालकमंत्री अजित पवार अखेर आज अवतरले. पवार यांनी आज दुर्घटनाग्रस्त पुलाच्या ठिकाणी भेट दिली. तसेच, रुग्णालयात जाऊन दुर्घटनेतील जखमींची विचारपूस केली. यावेळी पत्रकारांशी बोलताना त्यांनी पुणे जिह्यातील जे धोक्याचे पूल आहेत, तसेच, जे लोकांच्या वापरण्याच्या योग्यतेचे नाहीत, त्याठिकाणी प्रवेश बंदीचे फलक लावण्यापेक्षा असे आयुष्य संपलेले तसेच स्ट्रक्चरल ऑडिटर्स यांनी वापरण्यास धोकादायक असा शेरा दिलेले सर्व धोकादायक पूल पाडण्यात येतील, अशी माहिती दिली.

पुंडमळा येथील इंद्रायणी नदीवरील लोखंडी पूल कोसळून झालेल्या भीषण दुर्घटनेत वर्षा विहारासाठी आलेले 55 पर्यटक नदीपात्रात पडले. या दुर्घटनेत चार पर्यटक मृत्युमुखी पडले. तर, 51 जण जखमी झाले. मात्र, एवढी गंभीर घटना घडूनही राज्याचे उपमुख्यमंत्री तथा जिह्याचे पालकमंत्री असलेले अजित पवार यांना घटनास्थळी भेट देण्यास वेळ मिळाला नाही. पक्षाच्या प्रचार कार्यात गुंतलेल्या अजित दादांनी रुग्णालयात उपचार घेणाऱ्या जखमींना भेटण्याची साधी तसदीही त्यांनी घेतली नाही. त्यामुळे गायब असलेल्या अजित पवार यांच्याबाबत चर्चेला उधाण आले होते.