इलॉन मस्क यांची कंपनी ‘न्यूरालिंक’ने एक असे उपकरण विकसित केलंय, जे नसलेली गोष्ट तुम्हाला दाखवेल. सध्या या ब्रेन चिपचा प्रयोग माकडांच्या मेंदूवर सुरू आहे. हा प्रयोग कमालीचा यशस्वी झाला आहे. ब्रेन चिपमुळे माकडांना काल्पनिक दृश्य दिसू लागले. येत्या काळात ब्रेन चिपचा प्रयोग मानवावर होणार आहे. नेत्रहिनांसाठी हा प्रयोग म्हणजे आशेचा किरण ठरेल असा विश्वास कंपनीने व्यक्त केला.
‘न्यूरालिंक’ने माकडांच्या मेंदूत चिप बसवली आहे. ब्लाइंडसाईट असे या उपकरणाचे नाव आहे. माकडांमध्ये ब्रेन इम्प्लांट टेस्टिंग सुरू आहे. या प्रयोगातून मानवाला सुपरपॉवर मिळण्याचा दावा केला जात आहे. या प्रयोगांतर्गत जी गोष्ट वास्तवात नाही, ती माकडांना दिसू लागली आहे. नेत्रहिनांना दिसावे या दिशेने टाकलेले हे महत्त्वाचे पाऊल समजले जात आहे.
न्यूरालिंक इंजिनीअर जोसेफ ओ’डोहर्टी यांनी नुकतीच पत्रकार परिषदेत या प्रयोगाची माहिती दिली. ब्लाइंडसाईट उपकरणाने माकडांच्या मेंदूतील दृष्टीशी संबंधित भाग उत्तेजित केला. त्यामुळे क्षणार्धात माकडांनी आपले डोळे अशा ठिकाणी फिरवले, ज्याची कल्पना करण्यासाठी मेंदूला प्रेरित करण्याचे काम संशोधक करत होते. ब्लाइंडसाईट उपकरणाचे निष्कर्ष पहिल्यांदाच सर्वांसमोर मांडण्यात आले आहेत.
- ब्रेन चिप एखाद्या व्यक्तीच्या डोळ्यासारखेच काम करते.
- ब्लाइंडसाईट उपकरणाची चाचणी गेल्या अनेक वर्षांपासून माकडांवर सुरू आहे. या वर्षाच्या अखेरपर्यंत मानवावर त्याची चाचणी केली जाईल.
- अतिशय आव्हानात्मक वैद्यकीय स्थितीत या उपकरणाचा वापर होऊ शकतो. अद्याप या उपकरणाला अमेरिकेने मानवी वापरासाठी संमती दिलेली नाही. प्राण्यांवरील अभ्यासातून काढलेले निष्कर्ष मानवासाठी किती लागू होतात, हे पाहावे लागेल.
- ही चिप एका खास चष्म्यासोबत जोडून सर्वोत्तम व्हिज्युअल डेटा दाखवण्यास मदत होईल, असा विश्वास न्यूरालिंक इंजिनीअर जोसेफ ओ’डोहर्टी यांनी व्यक्त केला.
Comment List