भाजपने जे अख्ख्या देशात पेरले ते पहिल्यांदाच मुरबाडमध्ये उगवले. भाजप आमदार किसन कथोरे आणि अन्य नेत्यांच्या मनमानीला कंटाळून मुरबाड नगरपंचायतीमधील भाजपचे दहा नगरसेवक फुटले. या नगरसेवकांनी बंडाचा झेंडा उभारत मुरबाड परिवर्तन पॅनल हा वेगळा गट स्थापन केला. या स्वतंत्र गटासाठी त्यांनी ठाणे जिल्हाधिकाऱ्यांकडे मान्यता मागितली आणि जिल्हाधिकाऱ्यांनी आज या स्वतंत्र गटाला मान्यताही दिली. मुरबाड नगरपंचायतीत भाजपचे १२ नगरसेवक होते. त्यापैकी दहा नगरसेवकांनी पक्षाला रामराम ठोकल्यामुळे आता अवघे दोन नगरसेवक उरले असून नगरपंचायतीतील या राजकीय उलथापालथीमुळे एकच खळबळ उडाली आहे.
मुरबाड नगरपंचायतीत भाजपचे 12 नगरसेवक निवडून आले आहेत. त्याचबरोबर दोन स्वीकृत नगरसेवकही आहेत. त्यामुळे 17 सदस्य संख्या असलेल्या नगरपंचायतीवर भाजपची सत्ता आहे. गेल्या काही महिन्यांपासून आमदार किसन कथोरे नगरसेवकांना अपमानास्पद वागणूक देतात. त्यांची कोंडी करतात, असा संताप भाजपच्या नगरसेवकांमधून उघडपणे व्यक्त केला जात होता. या नगरसेवकांच्या प्रभागात विकासकामे केली जात नसल्याचा आरोपही त्यांच्याकडून होत होता. केवळ ठरावीक प्रभागातच कथोरे कोट्यवधींचा निधी ओततात, पण आमच्यावर अन्याय करतात. उपनगराध्यक्ष पदाच्या निवडणुकीतही कथोरे यांनी पक्षाबाहेरील उमेदवार आमच्यावर लादला, अशी संतापाची खदखद भाजपच्या नगरसेवकांमधून व्यक्त होत होती. भाजपच्या 12 नगरसेवकांपैकी 10 नगरसेवक फुटल्यामुळे या नगरपंचायतीमध्ये असलेली भाजपची सत्ता संपुष्टात आली आहे.
जिल्हाधिकाऱ्यांचे शिक्कामोर्तब
भाजप नगरसेवकांच्या संतापाचा अखेर स्फोट झाला आणि माजी नगराध्यक्ष, नगरसेवक रामभाऊ दुधाळे, गटनेते मोहन गडगे, उपनगराध्यक्षा दीक्षिता वारे-वारघडे, ऊर्मिला ठाकरे, नम्रता जाधव, अनिता मार्के, रविना अधिकारी, सुजित ठाकरे, नंदकुमार जाधव, विनायक अधिकारी यांनी भाजपला रामराम ठोकला. भाजपमधून बाहेर पडलेल्या या सर्वच नगरसेवकांनी ‘मुरबाड परिवर्तन पॅनल’ हा वेगळा गट स्थापन केला आहे. या वेगळ्या गटाला ठाणे जिल्हाधिकारी कार्यालयाने आजच मान्यता दिली. या मान्यतेचे पत्र मुरबाड नगरपंचायतीला मिळाले आहे. इतक्या मोठ्या संख्येने नगरसेवक बाहेर पडल्याने भाजप पक्षाला आणि आमदार किसन कथोरे यांना मोठा धक्का बसला आहे.
Comment List