विद्यार्थ्यांनी अनुभवली विज्ञानाची अद्भुत दुनिया;  युवासेनेने मुलांना घडवली नेहरू विज्ञान केंद्राची सहल

विद्यार्थ्यांच्या सर्वांगीण विकासासाठी विज्ञानाच्या माध्यमातून सोप्या भाषेत सांगण्यासाठी शिवसेना नेते युवासेना प्रमुख आमदार आदित्य ठाकरे यांच्या वाढदिवसानिमित्त युवासेनेच्या वतीने विद्यार्थ्यांसाठी वरळी येथील नेहरू विज्ञान केंद्रात शैक्षणिक सहलीचे आयोजन करण्यात आले होते. युवासेना सहसचिव प्रथमेश बोभाटे व युवासेना शाखा अधिकारी नितीन शिरोडकर यांच्या वतीने प्रभाग 198 मधील विद्यार्थी-विद्यार्थिनींसाठी ही शैक्षणिक सहल आयोजित करण्यात आली होती.

वैज्ञानिक शैक्षणिक सहलीच्या उपक्रमातून विद्यार्थ्यांना विज्ञानाच्या गूढ, रोचक आणि प्रेरणादायी जगाची प्रत्यक्ष अनुभूती मिळाली. त्यांच्या जिज्ञासेला चालना देणारा, नवकल्पनांना प्रोत्साहन देणारा आणि विज्ञानाभिमुख दृष्टिकोन विकसित करणारा अनुभव लाभला. विज्ञान प्रदर्शन, प्रयोगशाळा, तंत्रज्ञान गॅलरी व सायन्स शो यांमधून मुलांनी नव्या ज्ञानाची ओळख करून घेतली आणि त्यांच्या ज्ञानात भर पडली. विद्यार्थ्यांमध्ये विज्ञानाबद्दल आत्मीयता निर्माण करणारा, अभ्यासाची गोडी वाढवणारा आणि त्यांच्या सर्वांगीण विकासाला दिशा देण्यास हा उपक्रम यशस्वी ठरला. या उपक्रमाला अनेक मान्यवरांची उपस्थिती लाभली. यामध्ये शिवसेना आमदार सुनील शिंदे, उपनेत्या किशोरी पेडणेकर, भारतीय विमा सेना सरचिटणीस दिनेश बोभाटे, भारतीय कामगार सेनेचे संयुक्त सरचिटणीस संजय कदम, उपविभागप्रमुख राम साळगावकर, वरळी विधानसभा संघटक निरंजन नलावडे, सामाजिक कार्यकर्ते बाळाशेठ खोपडे, विधानसभा संघटक अनुपमा परब, शाखाप्रमुख दीपक बागवे, शाखा संघटक शारदा पापण, यांच्यासह शिवसेना, युवासेना पदाधिकारी मोठय़ा संख्येने उपस्थित होते.